Ақмолада теміржолшы ардагерлер арасында шахматтан турнир өтті
«Қазақстан теміржолшысы» газетінің тілшісі
Теміржол көлігі қызметкерлері күніне арналған ардагерлер арасындағы шахмат турнирі темір жолға саналы ғұмырын арнаған ақмолалық зейнеткерлердің басын қосты.
Ақыл мен ой, зейін мен зеректік, шапшаңдық пен ұтқырлық таразы басында теңесетін зияткерлік ойынының жоғары деңгейде өтуіне Ақмола өңірінің ардагерлер кеңесі мен «Қазтеміржолкәсіп» ҚБ Ақмола филиалы ұйытқы болды.
Жарысқа 11 теміржолшы ардагер қатысты. Турнир тек қызықты әрі тартымды ойын сайысы ғана емес, сонымен қатар сала ардагерлерінің сағына кездесіп, бірлесе жұмыс істеген жылдарын еске алып, шер тарқатып, көтеріңкі көңіл-күймен әзілдесіп, әңгімелескен басқосу алаңы болды.
Десе де, жарыстың аты жарыс емес пе?! Шаршы тақтаның үстінде шахмат фигураларын «соғыстырып», патшаны «өлтіруге» барын салған 11 ойыншының арасынан суырылып шығып, қарсыластарын шаң қаптырған үш зейнеткер турнир жеңімпаздары деп танылды. Олар бірінші орынды еншілеген Илья Мателенок, екінші орынды иеленген Марат Мұсабаев және үшінші орынды місе тұтқан Сансызбай Әлжанов болды.
Турнирдің қорытындысы бойынша жеңімпаздар мен қатысушылар грамоталармен және бағалы сыйлықтармен марапатталды.