Маңғыстаудың намысын қорғайды
Маңғыстау облысы бойынша меншікті тілші
Маңғыстау станциясында «Қазтеміржолкәсіп – 2026» теміржолшылар футбол лигасы Кубогынының» батыс аймақтық турниріне үміткерлер іріктелді.
Теміржолшылар мерекесі қарсаңында шағын футболдан ұйымдастырылған облыстық турнир ең мықтыларды анықтады. Түбек теміржолының түрлі мекемесінен бірнеше команда қатысып, өзара бақ сынасты. Маңғыстау, Бейнеу, Шетпе, Жаңаөзен, Болашақ, Қарақия станцияларынан командалар қатысты. Тепсе темір үзетіндей шыныққан теміржолшылардан құралған команданың қай-қайсысы да Кубоктан үміткер еді. Бірі екіншісінен кем түспей, оңайлықпен есесін жібермей ойнаған матч ұзаққа созылды. Тартыс пен қызыққа толы ойынның нәтижесінде бірінші орынды Маңғыстау вагон депосының, екінші орынды Маңғыстау магистральдық желі бөлімшесінің, үшінші орынды Маңғыстау локомотив депосының командалары алды. Жеңімпаз топтар ойынның кубогы, медалі мен дипломына және қаржылай сыйлыққа ие болды.
Жақсы ойын көрсеткен жігіттер де марапатсыз қалмады. Оларға түрлі номинациялар табысталды. «Үздік ойыншы» вагон депосынан Ерболат Архабаевқа, «Үздік сұрмерген» локомотив депосынан Нұржан Хамидуллаға бұйырды. Магистральдық желі бөлімшесінен Айболат Бекжанов болса аймақтық турнирдің «Үздік қақпашысы» атанды. Жеңімпаздар енді Ақтөбе қаласында өтетін батыс аймақтық турнирде Маңғыстаудың намысын қорғайды.