Арыстықтар – ауыспалы кубок иегері
«Қазақстан теміржолшысы» газетінің тілшісі
Теміржолшылар күніне орай Арыс қаласында Шымкент магистральдық желі бөлімшесінің ауыспалы кубогы үшін шағын футболдан дәстүрлі турнир өтті.
«Қазтеміржолкәсіп» ұйымымен бірлесіп өткізілген жарысқа бөлімшенің барлық мекемелерінен жасақталған 16 команда қатысты.
– Теміржолшылар арасында салауатты өмір салтын насихаттау, бұқаралық спортты дамыту және ұжымдар арасындағы бірлік пен достықты нығайту мақсатында өткізіліп отырған турнирге командалардың тыңғылықты дайындалып келгенін байқадық. Тартысқа толы әрі әсерлі ойын өрнегін көрсетті, – деді Шымкент магистральдық желі бөлімшесі директорының пайдалану жөніндегі орынбасары Жомарт Мырзабеков.
Әрине, жарыстың аты жарыс. Бірінің бабы келмесе, біріне сәттілік жетіспеді. Осылайша, бағы жанып, бабы келіскен үш команда қарсыластарын ойсырата жеңіп, жеңіс тұғырына көтерілді. Бірінші орынды Арыс белгі беру және байланыс дистанциясының, екінші орынды Арыс локомотив пайдалану депосының командасы, ал үшінші орынды Сарыағаш станциясының командасы иеленді.
Бұдан бөлек, турнирде үздік ойын көрсеткен ойыншылар анықталып, үздік қақпашы ретінде – Төлемісов Дүйсен (ПЧ-53), үздік шабуылшы – Әшім Бақдәулет (ДС Сарыағаш), үздік ойыншы деп Садықбеков Мақсат (ТЧ-32) танылды. Жарыс соңында жеңімпаздар мен жүлдегерлерге ауыспалы кубок, медальдар, дипломдар және бағалы сыйлықтар салтанатты түрде табысталды.