«Теміржол қалқаны» – жеңімпаз

Жуырда Алматы қаласында шағын футболдан салалық кәсіподақ жүлдесі үшін өңіраралық сайыс өтті. Жыл сайын өткізілетін дәстүрлі байқауда «ӘТЖК» ЖШС Семей филиалының «Теміржол қалқаны» командасы да өнер көрсетті.

Күзет қырандарынан құралған футбол командасын филиал басшысы Самат Райымбеков өзі бастап барды. Осыған дейін тыңғылықты жаттығу жасап шынығып, бабы келіскен жігіттер бұл жарыста барын салды. Қарсыластар да оңай емес еді. Әсіресе Алматы мен Өскемен командаларымен болған кездесулер мейлінше шиеленісті өрбіді.  

Дегенмен тартысты өткен бәсеке барысында семейлік сарбаздардың жұлдызы жанып, Алатау төрінен бас жүлде бұйырды.  

– Футболшы жігіттеріміз керек-жарағы түгел, төрт құбыласы сай аттанды. Барлық қажеттіліктерін өтеуге кәсіподақ ұйымы демеушілік жасады. Бұл сапарды мекеме басшылығы тікелей назарға алғанын да айта кету керек. Сайыс жігіттердің бірлігі мен жоғары физикалық даярлығын көрсеткен шара болды, – дейді филиалдың кәсіподақ ұйымының төрағасы Амантай Катпенов.  

Жеңімпаз команданы Семей теміржол вокзалынан барша әріптестері, кәсіподақ белсенділері зор сән-салтанатпен күтіп алды. Қазіргі күні «Теміржол қалқаны» командасы келесі республикалық сайысқа даярлықты бастап кетті. Арқаны кеңге салуға болмайды. Себебі алдағы қазан айының 8-9 күндері Бурабай станциясында «Қазтеміржолкәсіп-2026» теміржол футбол лигасы кубогы үшін өтетін сайыста еліміздің әр түкпірінен келетін өзге де азулы командалармен сынға түсуі тиіс. Жылдың ақтық сайысына ұлттық компанияның 5 үздік командасы жүлделі орындарды өзара бөліске салмақ.