Теміржолшылар мерейтой иесіне турнир арнады

«ҚТЖ» ҰК» АҚ филиалы – «Тасымалды басқару дирекциясының» аға диспетчері Сұлтанбек Түймебайұлы 60 жасқа толды. Мерейтой иесі бірге қызмет ететін әріптестерінің басын қосып, волейболдан турнир ұйымдастырды.

Теміржол саласында жоғары білім алған Сұлтанбек Түймебайұлы еңбек жолын осыдан 33 жыл бұрын Ақтөбе облысы, Байғанин ауданы, Жарлы станциясында станция кезекшісі болып бастаған екен. Бірнеше жылдан кейін Ақтөбе бөлімшесіне пойыз диспетчері болып ауысады. Арада тағы біраз жылдар өткен соң қозғалыс саласындағы еңбегі Астанада жалғасып, ҚТЖ-ның «Тасымалды басқару дирекциясы» филиалының Пойыздар қозғалысын басқару орталығында бағыттар бойынша аға диспетчер қызметін күні бүгінге дейін атқарып келеді. Кәсібіне адал, жауапты да сауатты диспетчер ретінде басшылықтың сеніміне, әріптестерінің құрметіне ие болған өз ісінің майталманы. 

Турнирге «Тасымалды басқару дирекциясы», «ЦЖС», «ГВЦ», «ДС Нұрлы жол», «ДС Астана» және «ҚТЖ ардагерлері» командалары қатысты. 

Жарыс қорытындысы бойынша «ГВЦ» командасы 1-орын, «ЦЖС» командасы 2-орын, ал «ДС Астана» командасы жүлделі 3-орынды алды. Дегенмен, жарысқа қатысқан барлық командалар марапатталып, әріптестер «достық жеңді» деген риза көңілмен тарасты. 

Бекзат МҰҚАШЕВ, Астана