Кәсіби мерекеге орай Семейдегі белсенді кәсіподақ қызметкерлері түрлі марапаттарға ие болды
Абай облысы бойынша меншікті тілші
Семей ЖТ бөлімшесінде ҚР Кәсіподақтар күні мерекесіне орай ерекше салтанатты шара болып өтті, деп хабарлайды Rail-news.kz. Бұл күні бөлімшенің бас кеңсесінің алдына кәсіподақ ұйымдарының төрағалары және белсенділері жиналып, көпшілік алдында бөлімше бойынша кәсіподақ төрағасы Алик Досанов сөз алды. Мерекеге орай құттықтау лебізін білдірген ол, күрделі жұмыста тер төгіп жүрген әріптестеріне алғысын айтты. Жиын барысында Семей магистральдық желі бөлімшесінің кадр бөлімі басшысы Данияр Баймағұлов та басшылық атынан құттықтады. Дегенмен аталмыш жиынның негізгі өзегі кәсіподақ белсенділерін марапаттау сәті болды. Көпшілік қошеметіне ие болған теміржол мекемелеріндегі кәсіподақ ұйымдарының төрағалары мен бірқатар теміржолшылар кәсіподақ басшылығының атынан арнайы Алғыс хатпен қоса ақшалай сыйлық иеленді. Бұл күні мерейге бөленген жандардың арасында Семей станциясының кәсіподақ төрайымы Шәрбат Мейірманова, ПЧ-40 кәсіподағының жетекшісі Зульфия Еникеева бар. Осыдан соң кезек гимнастикалық жаттығуларға берілді. Бөлімшенің «Локомотив» спорт клубының нұсқаушысы Наталья Мешкованың жетекшілігімен алаңға жиналған теміржолшылар таңғы бой сергітті.