Иран мен Ауғанстан арасында алғашқы жолаушылар пойызы жолға шығады
Ираннан Ауғанстанға алғашқы жолаушылар пойызы келесі аптада жүре бастайды, деп хабарлайды Rail-news.kz.
Тарихта алғаш рет жолаушылар пойызы Иранның солтүстік-шығысындағы Хаф қаласынан Ауғанстанның батысындағы Герат қаласына бағыт алады. Бұл туралы "Салам Ватандар" радиостанциясы Герат провинциясы әкімінің баспасөз хатшысы Мұхаммад Юсуф Саидиге сілтеме жасап хабарлады.
«Хафтан Гератқа алғашқы жолаушылар пойызы 10 күн ішінде қатынай бастайды. Бұл пойыздың іске қосылуы – азаматтардың жүріп-тұруын жеңілдету және Ауғанстан мен Иран арасындағы экономикалық әрі мәдени байланыстарды нығайту жолындағы маңызды қадам», – делінген хабарламада.
Ирандық БАҚ-та Ауғанстанмен теміржол арқылы жолаушылар тасымалы іске қосылатынын хабарлап отыр. Иранның жол және қалалық даму министрінің орынбасары Джаббар Әли Закеридің айтуынша, пойыз жолаушыларды Иранның Мешхед қаласынан алып, Хаф арқылы Ауғанстан шекарасынан өтіп, Гератқа дейін жетеді.
«Мешхед пен Герат арасында жолаушылар пойызын ұйымдастыру бойынша жоспарлар жасалды. Біз бұл бағыттағы алғашқы пойыз алдағы екі аптада жолға шығады деп күтіп отырмыз», – деген Закеридің сөзін Afghanistan International өңірлік жаңалықтар порталы келтірді.
Ираннан Ауғанстанға теміржол құрылысы 2007 жылы басталған. Жол Хорасан-Резави провинциясындағы Хаф қаласы арқылы Гератпен Иранның теміржол желісін жалғайды. Оның ұзындығы — 225 шақырым, оның 147 шақырымы Ауғанстан аумағымен өтеді. Жол бастапқыда екі ел арасында жүк тасымалдауға арналған болатын. Ауғанстандағы әскери қақтығыстар мен 2021 жылғы тамызда Кабулда биліктің өзгеруіне байланысты жол қозғалысы тоқтатылған еді, бірақ 2022 жылы қайта жанданған.
2024 жылғы наурызда Ауғанстан бұл теміржол арқылы алғаш рет ЕО елдері мен Түркияға 1,2 миллион долларлық 200 тонна жаңғақ, мейіз, бадам экспорттады.
Қазіргі таңда Ауғанстанда жолаушылар пойызы жоқ, ал Мешхед пен Герат арасында тек автобустар мен маршруттық таксилер қатынайды.