Ауғанстан Иранға баратын теміржолдың соңғы кезеңін іске қосты
Ауғанстан Херат–Хаф теміржолының соңғы құрылыс кезеңін бастағанын жариялады. Бұл жоба алғаш рет елді Иранның теміржол желісімен тікелей байланыстырады. Ауғанстанның Қоғамдық жұмыстар министрінің орынбасары Мұхаммад Исхақ Сахибзаданың айтуынша, қазір ұзындығы 47 шақырым болатын соңғы учаскеде жұмыс жүргізілуде, деп хабарлайды Rail-news.kz.
Жобаның құны – 54 миллион доллар, қаржыландыру толығымен Ауғанстан бюджеті есебінен. Құрылысты осы жылдың соңына немесе 2026 жылдың басына дейін аяқтау жоспарланып отыр, әзірлік деңгейі қазірдің өзінде 90 пайызға жеткен.
Херат–Хаф теміржолы төрт кезеңнен тұрады, әр елде екі кезеңнен. Иран өз бөлігін ертерек аяқтаған, ал Ауғанстан бір кезеңді салып үлгерген. 2021 жылы тәлібтер билікке келген соң жұмыстар тоқтатылған еді, бірақ 2023 жылы Кабул мен Тегеран қарым-қатынасының қалыпқа келуі аясында қайта жанданды. Сол көктемде дайын учаскелерде сынақ пойызы іске қосылған.
Жаңа бағыт Хератты өндірістік аймақпен және халықаралық әуежаймен байланыстырып, Иранның Чабахар портына шығуды қамтамасыз етеді. Болжам бойынша, алғашқы жылдың өзінде Ауғанстан осы желі арқылы кемінде 100 мың тонна тауар экспорттай алады. Бұл елдің экспорттық мүмкіндіктерін едәуір кеңейтіп, тасымал шығындарын азайтады.
Жоба Кабулдың Ауғанстанды аймақтағы транзиттік торапқа айналдыру стратегиясындағы маңызды қадам ретінде қарастырылады. Биылғы жылы Қытайдың Шыңжаң аймағына апаратын Вахан дәлізі арқылы автожол салу да басталған. Бұл бастама Иран мен Қытайды Ауғанстан аумағы арқылы байланыстыру жоспарына сай келеді.