Stadler компаниясы Дублин - Белфаст бағыты үшін гибридті пойыздар шығарады
Stadler компаниясы Ирландия темір жолымен (Iarnród Éireann, IÉ) және Солтүстік Ирландияның Translink Northern Ireland Railways (NIR) мемлекеттік компаниясымен келісімшартқа отырып, жаңа нарыққа қадам басты, деп хабарлайды Rail-news.kz.
Швейцариялық өндірушіге FLIRT сериялы сегіз гибридті пойызға тапсырыс берілді. Бұл пойыздар 2030 жылы Ирландия Республикасы мен Солтүстік Ирландия астаналарын жалғайтын ұзындығы 180 шақырымдық трансшекаралық магистральда қатынай бастайды деп жоспарлануда.
Келісімшарт аясында алдағы 15 жыл бойы техникалық қолдау көрсету, қосалқы бөлшектермен қамтамасыз ету, инженерлік қызметтер мен техникалық қызмет көрсету сапасын бақылау, сондай-ақ мамандарды оқыту жұмыстары қарастырылған.
Жаңа пойыздар пайдалану мерзімі аяқталуға таяған ескі құрамдардың орнын басады. Олар іске қосылғаннан кейін Дублин мен Белфаст арасындағы жол жүру уақыты 2 сағаттан азайып, күнделікті рейстер саны екі бағытта да 16-ға дейін артады.
Әрбір төмен табанды пойыздың ұзындығы 200 метрді құрайды және 407 жолаушыға арналған. Жолаушылар үшін жайлы орындықтар, тегін Wi-Fi желісі және тағамдар мен сусындарды тікелей орынға жеткізу қызметі қарастырылған. Сондай-ақ, вагон едені мен платформа арасындағы алшақтықты жоятын жылжымалы қондырғылар, мүмкіндігі шектеулі жандарға арналған арнайы орындар мен дәретханалар орнатылған.
Солтүстік Ирландиядағы темір жолдар әлі толық электрлендірілмегендіктен, пойыздардың тарту жүйесі түйіспелі желіден, дизельдік қозғалтқыштан немесе аккумулятордан қуат ала алады. Сонымен қатар, борттық жабдықтар Дроэда қаласынан (Дублин мен Солтүстік Ирландия шекарасының ортасында орналасқан) Белфастқа дейінгі учаскені 25 кВ кернеулі айнымалы токпен электрлендіру болашағына бейімделген. Кейіннен дизельдік қозғалтқыштарды алып тастап, аккумуляторларды сақтап қалуға болады, бұл пойыздарға электр желісі жоқ жолдармен де жүруге мүмкіндік береді.
Жаңа пойыздарды сатып алу мен инфрақұрылымды дайындауды қамтитын бұл жобаны Ирландия Республикасы мен Солтүстік Ирландия үкіметтері бірлесіп қаржыландыруда. Олар жалпы сомасы 548 млн фунт стерлинг (698 млн еуро) бөлді. Бұған қоса, Еуропалық Одақтың қатысуымен өтетін британ-ирланд бірлескен бағдарламасы аясында тағы 165 млн еуро бөлінетін болады.