Литваға 12 жаңа Stadler Flirt пойызы жеткізілді
Литва темір жолының жолаушылар тасымалымен айналысатын LTG Link компаниясының жылжымалы құрамы 12 жаңа Stadler Flirt пойызымен толықты, деп хабарлайды Rail-news.kz.
Оның 7-еуі электрлі, ал 5-еуі аккумуляторлы құрамдар. Жергілікті теміржол операторының сайтында хабарланғандай, бұл пойыздар қазірдің өзінде сынақтан өтіп жатыр, ал жолаушыларды тасымалдау осы жылдың күзіне жоспарланған.
Қазіргі уақытта статикалық және динамикалық тестілеу жұмыстары жүргізілуде. Сынақ барысында пойыздардың түрлі жылдамдықтағы, соның ішінде екпін алу, бәсеңдеу және қалыпты қозғалыс режимдеріндегі жұмысы сараланады.
Алғашқы кезең аяқталған соң тиісті сертификаттау процедуралары өтеді. Сынақ нәтижелерін бағалай келе, Литваның көлік қауіпсіздігі әкімшілігі нысандарды пайдалануға рұқсат береді.
Жаңа Stadler Flirt электр пойыздары жолаушылар үшін әлдеқайда жайлы әрі кең болмақ. Бұл жылжымалы құрам Вильнюс–Клайпеда–Вильнюс бағыты бойынша қатынайды.
Ал электрлендірілген және электрлендірілмеген теміржол желілерінде бірдей жүре алатын аккумуляторлы пойыздар Литвада Каунас–Шяуляй–Каунас және Вильнюс–Варена (Марцинконы)–Вильнюс бағыттарында қатынайды деп күтілуде. Оларда 128 отыратын орын қарастырылған, кофе мен жеңіл-желпі тағамдар сататын автоматтар орнатылған. Сондай-ақ жолаушыларға қолайлы болу үшін мүмкіндігі шектеулі жандарға да толық бейімделген. Электр желімен жүргенде бұл пойыздар сағатына 160 шақырымға дейін жылдамдықпен жүрсе, аккумулятор режимінде сағатына 120 шақырымға дейін жүре алады.