Әлеуметтік жүк жеткізілімі жіті назарда
«Қазақстан теміржолшысы» газетінің тілшісі
«ҚТЖ-Жүк тасымалы» ЖШС ел Үкіметінің тапсырмасы бойынша әлеуметтік маңызы бар азық-түлік өнімдерін тасымалдауды басты орынға қояды. Серіктестік әлеуметтік маңызы бар жүктерді үздіксіз тасымалдау үшін барлық қажетті шараларды қабылдауда.
Астық, ұнтақталған өнімдер, қант, майлар, көкөністер және тағы басқа жүктерді ішкі жеткізуді реттеу үшін серіктестік мүдделі мемлекеттік органдар, әкімдіктер, өңірлік ұн тарту операторлары өкілдерінің қатысуымен жиі басқосулар мен селекторлық кеңестер өткізеді. Селекторлық кеңес кезінде жүк жөнелтушілер жұмыста одан әрі оң нәтижелерге қол жеткізу үшін өз ұсыныстарын айта алады. Ал олардың көңілге қонымды ұсыныстары жүк тасымалдаушы оператор тарапынан ескерілері анық.
Ағымдағы жылдың қазан айындағы жағдай бойынша жүк жөнелтушілердің республика ішінде жүк тасымалдауға қатысты барлық өтініштері 100%- ға келісілген. Жүк тиеуге бос вагондарды беру ерекше бақылауға алынып отыр.
Қазіргі уақытта келісімшарт бойынша 8,8 мың тонна әлеуметтік бидай жөнелтілген. Қалған көлем бойынша жүк жөнелтушілерден теміржол көлігімен тасымалдауға өтініштер түспеген. «ҚТЖ-Жүк тасымалы» АҚ мамандары тасымалды тиімді ұйымдастыру – тасымалдау процесінің барлық қатысушыларының бірлескен өзара іс-қимылы мен тығыз ынтымақтастығын қажет ететінін еске салады.