Жүк көлемін арттыруға мүдделі

Атырау жүк тасымалы бөлімшесі Компания басшылығы алға қойған міндеттерді жүзеге асыру және бекітілген жоспарларды орындау мақсатында ауқымды жұмыстар атқарып келеді.

Былтырғы жұмыстарды саралағанда ең алдымен өндірістік жарақаттануға жол берілмеді. Сондай-ақ залалсыз тасымалданатын жүктердің сақталуы қамтамасыз етілді, жүк тиеу жоспары 103,9% орындалды. Еңбек қауіпсіздігі және еңбекті қорғау, өнеркәсіптік қауіпсіздік, электр қауіпсіздігі, өрт-техникалық минимум бойынша оқытуды жүргізе отырып, қызметкерлердің біліктілігі арттырылды, электр энергияны 2 565,05 мың шаршы/сағ немесе 41%-ға үнемдеуге қол жеткізілді, ал штаттың нақты мазмұны 100% жоспарға сәйкес келеді.  

«2024 жылға қойылған ағымдағы мәселелерді шешуге байланысты Теңдік, Қарабатан, Сағыз, Доссор, Ескене, Жамансор, Аққыстау, Сазанқұрақ станциялары бойынша ақпараттық жүйеге станция-торап АСУ бағдарламалары енгізілді», – дейді өндірістік-техникалық бөлім бастығы Әзиз Айжарықов.  

Сондай-ақ Мақат кентіндегі Мақат локомотив депосының 23 тұрғын үйінің коммуналдық желілерін жергілікті атқарушы органның балансына беру мәселесі шешілді. Мақат ауданы әкімінің ұзақ мерзімді активтерді қабылдау-беру актісіне әйкес жергілікті атқарушы органға өтеусіз беру жолымен «ҚТЖ-Жүк тасымалы» ЖШС-нің мүлкі, соның ішінде автомобиль жолдары, трансформаторлық қосалқы станциясы, электрмен жабдықтаудың инженерлік желілері, сумен жабдықтау, газбен жабдықтау торабы берілген. Бұл оларды күтіп-ұстау мен салық мәселелеріне оңтайлы ықпал етеді.

Бөлімше биылғы жылы да алдына келелі мақсат-міндеттер қойып отыр. Атап айтқанда, ол ең алдымен қозғалыс қауіпсіздігінің бұзылу деңгейін төмендету, дизель отынының үлестік шығынын төмендетуге қол жеткізу және жүк тиеу деңгейіне арттыру. Жүк жөнелтушілер биыл жүк көлемін арттыруға мүдделі. Болжал бойынша Теңдік станциясынан жүк жөнелтуші «Батыс Транс Групп» ЖШС мұнай өнімдерінің (бензол, параксилол, мазут, кокс, автобензин, дизель отыны, реактивті отын, газойл) жалпы көлемін 4 млн 418 мың 750 тонна немесе орташа тәуліктік 12106 тоннаға және химиялық заттарды 276 723 тоннаға немесе орташа тәуліктік 758 тоннаға жеткізуді, Карабатан станциясы бойынша жүк жөнелтуші «Теңіз Көлік компаниясы», «Исткомтранс» ЖШС түйіршіктелген күкірттің көлемін 1 969 097 тоннаға немесе тәулігіне орта есеппен 5 394 тоннаға жеткізуді, «Ртсхолдинг» ЖШС 338 329 тонна көлемінде полипропилен тасымалын тәулігіне орта есеппен 1 798 тоннаға жеткізуді, ал Құлсары станциясы бойынша «Теңізшевройл» ЖШС 1млн 424 мың 693 тонна көлемінде мұнай өнімдерін (пропан-бутан, мұнай, күкірт) немесе тәулігіне орта есеппен 3 903 тоннаға, 2 млн 691мың 162 тонна химикаттар немесе орташа 7 373 тонна, 1млн 524 мың 552 тонна шикі мұнай тасымалдауға немесе тәулігіне 4176 тоннаға жеткізуді көздеп отыр. Бұлар жүзеге асса аймақтағы тасымал көлеміне айтарлықтай серпін берері анық. Сонымен қатар бөлімше бойынша ғимараттар мен жылу желілеріне ағымдағы жөндеу жүргізуге 47 млн 444 мың 893 теңге қаралған. Оның ішінде Махамбет станциясы тауар кеңсесінің ғимараты, Ганюшкино, Ақжайық станцияларының әкімшілік ғимараты, Мақат станциясы ЭЦ бірлескен бекеті және техникалық қызмет көрсету пункті, «ТЧЭ-4 Мақат» қызметтік тұрмыстық корпусы ғимаратының су құбыры желілерін ағымдағы жөндеу жұмыстары бар.