Семей ЖТ бөлімшесі цифрлық даму дәуіріне дендей бастады

Қазіргі күндері Семей ЖТ бөлімшесі бойынша цифрландыру, жаңа ақпараттық технологиялар игілігіне сүйену мәселелері алға шыққан. Бұл бағыттағы шаралар «ҚТЖ» ҰК» АҚ-ның «Цифрлық трансформация» бағдарламасы аясында жүзеге асырылуда.

Осы орайда теміржолшылар үшін заманауи үлгідегі «ақылды технологиялар» дәуірі басталғаны белгілі. Бүгінде жүк тасымалы бөлімшесіндегі құжат алмасу, іс қағаздарын жүргізу толық автоматтандырылған. Мәселен, осыған дейін қағазсыз технология ішінде ең алдымен «Келісімді және коммерциялық жұмыс» басқару жүйесі іске асырылған болатын. Станциялардағы өтінім беру жұмыстары толықтай электронды түрде жүргізіледі. Сол тәрізді ЭЧ мекемесі бойынша автоматтандырылған ақпараттарды орталықтандыру, электр қуатын үнемдеудегі тиімділікті арттырар бағдарламалар да сәтімен жүзеге асырылды.

Әйтсе де, аталмыш бағыт бойынша әлі қолға алынуы тиіс шаралар бар. Оның барлығын нақтылап әрі тыңғылықты түрде зерттеу қажет. Бұл орайда ел шығысында да іргелі жұмыстар жасалуда. Әсіресе, магистральдық желі бөлімшесі бойынша жүзеге асырылуы тиіс бірқатар іргелі шаралар бар екен. Қазіргі күні желі бойындағы ПЧ мекемелерінде кейбір журналдар қолмен жүргізілетінін айта кету керек. Алдағы уақытта олардың бірқатарын электронды форматқа ауыстыру көзделуде. Сондықтан да, жол шаруашылығындағы барлық қызмет түрлері арнайы сарапқа алынуда. Нәтиже белгілі болған соң ғана техникалық кеңеске нақты ұсыныстар жасалатын болады. Ал автоматтандырылған қызмет әсіресе құжат алмасу ісінде үлкен жеңілдік әкелетіні белгілі.

Белгілі болғандай, қазіргі таңда бөлімшеге қарасты бірқатар мекемелерден ұсыныстар көптеп түсуде. Олардың арасында әсіресе Жаңа-Семей мен Семей тәрізді ірі жүк станцияларындағы дөңес қызметкерлері мен локомотив шаруашылығының мамандары ерекше белсенділік танытуда.

Бұл бағыттағы игілікті шаралар қазірдің өзінде басталып кетіпті. Атап айтсақ, бөлімшенің Жаңа-Семей станциясында маневрлік локомотивтерді пайдалану уақытын бөлек есепке алудың автоматтандырылған ақпараттық жүйесін енгізу шарасы жоспарлануда. Қазіргі уақытта IT-жүйені әзірлеу және енгізу бойынша арнайы техникалық тапсырмалар әзірленіп, жан-жақты пысықталуда.

Пилоттық жоба түрінде енгізілетін аталмыш бағдарлама маневрлік локомотивтердің нақты жүктемесін бағалауға, деректерді өңдеудің сенімділігін арттыруға, адами фактордың ықпалын азайтуға, станция жұмысындағы сыбайлас жемқорлықты болдырмауға, сондай-ақ жалпы өнімділікті арттыруға зор мүмкіндік береді екен. Ал, осынау жұмыс «ҚТЖ» ҰК» АҚ-ның «Цифрлық трансформация» бағдарламасының «Маневрлік жұмыстың тиімділігін арттыру» жобасы аясында жүргізілуде.

Басты мақсат – маневрлік жұмыстарда локомотивтерді қолданудың тиімділігін арттыру, барлық жүк станцияларында вагондарды уақытылы беру мен алып кетуді қамтамасыз ету болмақ. Ал, жаңа жобалар өзін толықтай ақтайтын болса, өзге бөлімшелердегі өндіріс процесіне де ұсынылатын болады.