Ақтау портында жүкті ауыстырып тиеу көлемі 15%-ға артты

Ақтау порты – Каспий теңізіндегі маңызды көлік торабы. Маңғыстау түбегінде орналасқан теңіз айлағы жүк кемелеріне қызмет көрсетуге жылдың төрт мезгілінде де дайын. Айлақтан мұнай және мұнай өнімдері, металл, астық және тағы басқа жүк түрлері пароммен жөнелтіледі. Биылғы жылдың бірінші тоқсанында Ақтау порты арқылы 1 млн тонна жүк ауыстырылып тиеліп, шетел асқан.

Қазақстан, Иран, Әзірбайжан, Түркіменстан, Ресей және Түркияны байланыстыратын көлік дәліздерінің қиылысында орналасқан порттың географиялық қолайлы орналасуының өзі жүкті ауыстырып тиеу көлемінің ұлғаюына ықпал етіп отыр. Мәселен, ағымдағы жылдың алғашқы үш айында заманауи көп мақсатты терминал арқылы жалпы ауыстырылып тиелген жүк көлемі 994 мың тоннаны құраған, 1 млн деуге болады. Бұл көрсеткіш 2022 жылдың сәйкес мерзімімен салыстырғанда 15% артық болып отыр. Осы ретте, мұнайды ауыстырып тиеу көлемі 43% артып, 743 мың тонна шамасын құраған. Яғни, жүктің басым бөлігін мұнай тиелімі құрап отырғанын көреміз. Биыл металл жүгін ауыстырып тиеу көрсеткішінің өткен жылға қарағанда бес есеге өскені белгілі болып отыр.

Атап өтерлігі, Ақтау портының қазіргі заманға сай инфрақұрылымы жүктің кез келген түрімен қатар контейнерлердің де өңделуіне мүмкіндік беріп отыр. Сонымен қатар теңіз сауда портын «Ақтау теңіз порты» арнайы экономикалық аймағы құрамына енгізуге шешім қабылдануы – порт инфрақұрылымын одан әрі дамытуды қамтамасыз етпек. Бұл, қызметтер спектрін кеңейтумен қатар, сапасын арттырып, контейнерлік тасымалдар мен жүк айналымын ұлғайтуға ықпал етеді. Жалпы еліміздегі теңіз порттарын одан әрі дамыту үшін бірқатар инфрақұрылымдық жобаларды іске асыру межеленген. Атап айтқанда, 2025 жылға қарай Каспий өңірі мен Орталық Азия елдері үшін контейнерлік сервис пен парк қалыптастыруға мүмкіндік беретін контейнерлік хаб құру жоспарланған. Жоба «Қуатты өңірлер – ел дамуының драйвері» ұлттық жобасына енгізілген. Бұл жобаны іске асыру контейнерлерді ауыстырып тиеу бойынша олардың көлемін жылына 300 мың ЖФЭ-ге дейін ұлғайта отырып, қызметтердің толық спектрін көрсетуге мүмкіндік береді. Контейнерлік хабтың жобалық қуатына қол жеткізу үшін № 3 айлақты ұзарту және № 12 айлақты қайта құрылымдау жоспарлануда. Сондай-ақ, Ақтау портының жылына 12,5 миллион тоннаға дейін мұнай құю қуатын қалпына келтіру үшін № 9 және № 10 мұнай құю айлақтарын қайта жаңарту жүзеге асырылмақ.