Жауапты жұмыста – жанашыр жандар

Жаңалықтар

30.06.2017, 14:51

Бағдаршамның уақытылы жануы, бағыттағыш бұрмалардың кестеге сай ашылып-жабылуы, пойыздардың жүруі мен тоқтауы үшін қызмет ететін сызбаларды реттейтін релелік блоктар жүрек соғысы немесе сағат сынды ақаусыз жұмыс істеуі тиіс. Арыс белгі беру және байланыс дистанциясының Бақылап, өлшеу қосынындағы (КИП) жөндеу технологиялық цех бөлімінде аталған құрылғылар күтімін жасап, жөндейтін негізінен әйелдер. Бір ауысымда он беске жуық қыз-келіншек отырып күн сайын 50-60 релелік блок құрылғысының ақауын қалпына келтіреді. Байланыс дистанциясының «миы» саналатын КИП орталығындағы нәзік жанды механиктердің алды 40 жылға жуық еңбек етіп зейнетке шықса, кейін келгендерінің 10-15 жылдық тәжірибесі бар. Аталған цехта Арыс – Сарыағаш, Арыс – Түркістан арасы мен Арыс станциясы бойынша бұзылған барлық релелік блоктар сауықтырылады. Яғни, күйіп кеткені анықталған соң, оны мұқият ашып көріп, қалпына келтіру керек. Механик әйелдер өздеріне бекітілген блоктарды жөндеген соң, екі рет тексереді, ал үшінші рет аға электр-механиктің сүзгісінен өтеді. Ол құрылғының толық жөнделгеніне көзі жеткен соң, пломбасын салып, этикеткасына қолын қояды. Солай «емделген» құрылғы қауіпсіздікті сақтауға сақадай сай өндіріске жол тартады. Цех мамандарының айтуынша, қазір жөндеп отырған релелік құрылғының дені ескіргендіктен, қажетті бөлшектер келмейді. Көпшілігі 1971-1972, тіпті 1969 жылдары шығарылған. Мерзім бойынша 30 жыл қолданысты болу керек болса да, бүгін 50 жылға дейін жуық қауіпсіздікке қызмет етуде. Арасында істен шыққан құрылғының өзін пайдаға жаратып, ішіндегі бөлшектерін алып, бір-біріне салып біріктіреді екен. Көнелерінің артықшылығы сол, оған 220 кВ тоқ берілетіндіктен әйелдер ішін жанар-жағармаймен тазалайды. Болашақта барлығы түйіспесіз релелік блоктарға яғни, бес жылда бір рет жаңартуды талап ететін МПЦ жүйесіне ауысуы мүмкін. Әзірге жыл сайын 24 механик пен 2 монтер екі мыңға жуық релелік блокты қалпына келтіріп тұрады.

Жауапты жұмыста – жанашыр жандар

Басқа да жаңалықтар

Қазақстан теміржолшысы газеті, №15 27 ақпан 2026 жыл