Күз - астық тиеу науқаны

Жалпы ұзындығы 119,7 шақырымды құрайтын Семей – Локоть телімінің бойында орналасқан бірқатар станциялар бойынша астық тиеу науқаны қызып тұр. Күзгі жиын-терім басталғалы бері ондағы станция қызметкерлері вагондарды жинап, тиелген астықтарды Семейдегі қамбаға жөнелту бойынша қарқынды жұмысқа көшкен.

Мәселен, жүзге тарта теміржолшы еңбек ететін, жүк тасымалы бойынша қозғалыс барысы аса жоғары, ғасырдан астам тарихы бар Ауыл станциясы толық күшінде жұмыс істеуде. Тамыз айынан бастап жергілікті диқандар тарапынан жүк жөнелтуге байланысты өтінімдер көп түскен. Сол себептен де, жабық контейнерлермен тасымалданатын сусымалы өнімдерді уақыт оздырмай дер кезінде діттеген жерге жеткізу міндеті күн тақырыбында тұр. Сондықтан да, станцияның тауар кассасы мен пойыз құрастырушылардың еңбегі аса қауырт.

Телім бойындағы Ауыл, Белағаш станцияларына жолы түйісетін аудандардың барлығы дерлік аграрлық өңірлерге жатады. Сол себепті де мұнда тиелетін жүкті – астық, бұршақ тұқымдас дақылдар мен күнбағыс, қарақұмық сынды сақтау мен жеткізудің өзіндік тәртібі бар сұранысы аса жоғары тауарлар құрайды.

Бүгінде станция қызметкерлері жоспарлы межеден ауытқымай үлгеріммен еңбек етуде. Осы ретте көрсеткіш көлемі де еселеп өскен. Атап айтсақ, биылғы жылы алдын ала берілетін өтініштер саны күрт артып отыр.Соңғы кезеңдегі көрсеткіш бойынша бір мезетте 15 вагонды жолға шығаруға мүмкіндік бар екендігі дәлелденді. Қазіргі күні бір жөнелтілім бойынша 10 вагонға тапсырыс беріледі екен. Қазіргі күні жазда егілген қара бидай мен күнбағысқа орақ түскендіктен қазан айындағы жұмыс мейлінше қарқынды.

Станция басшысы, ұзақ жыл еңбек өтілі бар тәжірибелі теміржолшы Қарлығаш Райымханованың айтуынша, бүгінгі таңда басты әріптес «Шығыс-Астық» ЖШС кірме жолында қарбалас жоғары. Қырман төрінен астық қоймаларына, одан станция басына жеткізілетін ас атасы бидай белгіленген жерге қатаң күзетпен жөнелтіледі. Бүгінгідей жауын-шашынсыз мерзім диқандарға да, теміржолшыларға да барынша қолайлы болып тұр.

– Станциямыз бойынша жүк тиеу мен жеткізуде кедергі жоқ. Жабық вагондар жеткілікті. Ағымдағы жылы миллион тоннадан жоғары көлемде астық жинаймыз деген облыс диқандары сөзінде тұрды, – дейді Қарлығаш Мазанқызы.

Дәл осындай жай Белағаш станциясында да орын алуда. Жекелеген клиенттер күнбағыс тиеуге жиі өтінім береді. Сонымен қатар, станция бастығы Ерғанат Төлебаевтың айтуынша, осыдан біраз бұрын Моңғолия республикасына осы өңірде өндірілген рапс дақылын бірнеше вагонға тиеп жөнелтіпті.

Маңыздысы сол, іс барысын жеделдетуде «Келісімді және коммерциялық жұмыс» автоматтандырылған басқару жүйесінің тиімділігі мол болып тұр. Яғни, жүкті жеткізу бойынша клиенттермен жүргізілетін құжаттар легі толыққанды электронды түрге көшірілген. Іскерлік байланыс осылайша артып келеді. Бұл ретте әрине бөлімшедегі логистика және тасымалдарды ұйымдастыру бөлімінің жетекші инженерлерімен тығыз қарым-қатынаста жұмыс жүргізілуде.