Тальгода істейтін жігіттер Испанияға кетіп жатыр – теміржолшы

ҚТЖ келбеті
29.07.2023, 13:16
Суреттер кейіпкердің жеке қорынан
Әділет Мұсахаев

"Қазақстан теміржолшысы" газетінің тілшісі

Соғыс кезінде алдымен темір жол көпірлерін қиратады, міне біз сондай кезде су бетіне жасанды көпір төсеп, пойыздардың үздіксіз жүруін қамтамасыз етуге дағдыландық. Бұл туралы Астана станциясындағы «Тұлпар-Тальго» вагондарына техникалық қызмет көрсету пунктінің механигі Аманқұл Жайханов тілдесу кезінде айтты.  

Ел экономикасының күре тамыры саналатын темір жол саласында қазір жүз мыңнан астам адам қызмет етіп жатыр. Олардың ішінде локомативті тізгіндейтін машинистер, жолаушыларға қызмет көрсететін жолсеріктер, жол бойындағы пойыздардың ақауын анықтайтын вагон қараушылар, жол төсеушілер, бұзылған пойыздарды жөндейтін механиктер, дистпечер мен басқа да сан қырлы маман иелері тер төгуде. Жұмысын адал атқарып жатқан сондай теміржолшылардың бірі Patentes Talgo мекемесінде техника бөлімінің механигі болып қызмет етіп жатқан Аманқұл Жайханов.

Понтонды теміржол көпірі  

Кейіпкеріміз темір жол саласындағы алғашқы қызметін әскерде жүргенде бастапты. Ақтөбе облысының Шалқар ауданына қарасты Тұмалыкөл ауылында дүниеге келген ол 1989 жылы әскери борышын өтеу үшін Украинаның Львов қаласына аттанып, сол жерде теміржол әскеріне қабылданады. Әскерде жүріп соғыс кезінде қираған темір жолдарды қалпына келтіруді және су бетіне понтоннан көпір төсеуді меңгеріп шығады.

«Әскерде негізінен понтонды теміржол көпірін құрастырумен айналыстық. Бұл көпір судың бетінде қалқып тұрады, онымен пойыз алаңсыз жүріп өте береді. Сондай-ақ автокөліктер де жүре алады, алдында шағын бағдаршам орнатылады. Ол кезде соғыс болмаса да жаттығулар жиі болып тұратын, понтондарды су бетінде құрастырып дайындығымызды пысықтап отырдық. Понтонның бір бөлшегінің көлемі 9 метр, яғни әрқайсысын бір көлікке тиеп әкелетін. Мысалы, өзеннің ені 200 м болса, соған қайықпен алып келіп түгелдей құрастырып шығатынбыз», – деп еске алады теміржолшы.  

Бала кезден механикамен әуестенген Аманқұл Жайханов көп жыл мұнай кен орындарында механик-дизельші болып жұмыс істеген. Соңғы алты жылдан бері Patentes Talgo мекемесінде механик-дизельші болып жұмысын жалғастырып жатыр. Негізгі міндеті – еліміздегі Тальго пойыздарына сервистік қызмет көрсету. Пойыз келіп тоқтаған соң оның бұзылған жерін жөндеуге 6 сағат уақыт беріледі екен. Осы кезде әр маман өзінің саласы бойынша пойызды тексеріп, бұзылған жерін жөндейді.  

 

«Мен негізінен пойыздың дизельді жағын қараймын. Тоқ беру бөлігі мен есікке тоқ беретін компрессорларын тексеремін. Тальго пойызында барлығы автоматпен жұмыс істейді, тоқты да, ауаны да тепловоздан емес, әр вагон өзінен алады. Мәселен, әдетегі пойыздар әр станцияға тоқтаған сайын вагон қараушылар тексеріп отырады ғой, бізде олай емес. Екі механик пойызда болады, бұзылса солар жөндейді. Пойыз жүрісінде күмәнді ақаулар болса оның барлығын журналға жазып отырады, келген соң оны бізге тапсырады. Біз сол бойынша тексеріп шығамыз. Жалпы Испанияда жасалған бұл пойыздардың жүрісі жақсы, жылдам әрі солқылдамай жүреді. Испандықтардың айтуы бойынша, біздің жолдарда түйіспелер өте көп. Оны бітеп тастауға тағы келмейді, өйткені біздің климат өзгеше, жазда рельс созылып, қыста тартылып отырады. Әйтпесе бұл пойыздар қазіргіден де жоғары жылдамдықпен жүретін еді», – дейді  А. Жайханов.

Мықты мамандарды Испанияға алып кетіп жатыр

Тальго пойызына қызмет көрсететін мекемеде қазір испандық мамандар азайған, олардың орнын қолынан іс келетін қазақтың бесаспап жігіттері басқан. Тек басшылық қызметте бір ғана испандық қалыпты.

«Біздің қазақтың жігіттері техниканы жақсы меңгеріп алды, өзімізді қойып Испанияға дейін барып жұмыс істеп жатыр. Жұмысына тиянақты, адал қарайтын мамандарды испандықтар өздеріне жұмысқа шақыруда. Олар сол жақтағы Тальго пойыздарын жөндейді. Жақында тағы бір жас жігітті сол жаққа шақыртумен алып кетті. Айтуынша, ол жақта жалақы жоғары. Қазір біздегі инженер, механик, техниктердің барлығы өзіміздің қазақтар. Оған қоса біздегі дәнекерлеуші жігіттерді де Испанияға жұмысқа шақырады, оларға деген сұраныс жоғары екен», – дейді теміржолшы.

Аманқұл Рамазанұлы сөз арасында испандықтар біздің мамандардың еңбекқұмарлығы мен төзімділігіне сүйсініп, таңқалатынын жеткізді. Мәселен, бізде бұзылған пойызды жөндеуге 5-6 сағат уақыт береді екен, сол уақытта мамандар барын салып жөндеп шығады. Ал, Испанияда бұзылған пойыздың орнына резервте тұрғанын жіберіп, ақау шыққан пойызды асықпай бір күн бойы жөндейтін көрінеді. Сол себепті шетелдіктер біздің жігіттердің шапшаңдығы мен біліктілігіне тамасана қарайды.  

Теміржолшы бос уақытында әріптестерімен бірге футбол ойнап, спортпен шұғылданғанды жаны сүйеді. Ауылда жүргенде аңға шығып, қақпан құрумен айналысыпты.

Тоғыз жолдың торабында тұрған Шалқар станциясында өскендіктен жақындарының көбі осы теміржолда жұмыс істегенін айтады. Жездесі Шалқар станциясында өмір бойы машинист болыпты, биыл зейнетке шықпақ. Сондай-ақ туысқан ағаларының бірі Қандыағаш станциясында вагон қараушы болып істеп жатыр.  

Аманқұл жары Гүлімжан екеуі екі бала тәрбиелеп өсіріп, бүгінде бір немере сүйіп отырған жайы бар. Тұңғышы прокуратурада істесе, кенжесі жақында журналистика мамандығы бойынша оқуын тамамдапты. Балаларына қазақы тәрбие беріп, бойларына ізгілік пен адамгершілік қасиеттерін сіңіре білген әке олардың өмірде өз орнын тауып, мықты маман болып шығуын қалайды.

Кездесу соңында кейіпкеріміз еліміздегі барлық теміржолшыларды кәсіби мерекесімен құттықтап, ізгі тілегін білдірді.

«Теміржолда жұмыс істеп жатқан жандардың барлығына табыс тілеймін! Отбасылары аман болсын, жұмыста абройлы болып, еңбектірінің жемісін көре беруіне тілектеспін!», - деді ол.

Қауіпсіздік
13.10.2025
Темір жол қателікті кешірмейді
Жаңалықтар
13.10.2025
Бақты – Аягөз теміржол желісінің құрылысы талқыланды
Аймақтар
13.10.2025
Теміржолшылар кәсіподағына – 120 жыл: Жамбылда үздіктер марапатталды
Аймақтар
13.10.2025
Қисановтар әулеті – байқау жеңімпазы
Спорт
13.10.2025
Корттағы күш пен құлшыныс
Жүк тасымалы
13.10.2025
Қазақстан логистика арқылы экономиканы дамытуды көздеп отыр
Аймақтар
13.10.2025
Тоқсан жасаған Тамара әжей
Әлеумет
13.10.2025
«Саламатты Қазақстан» пойызы Жетісу облысының тұрғындарына қызмет көрсетті
Жаңалықтар
11.10.2025
Астанада күрделі жөндеуден кейін локомотивтердің техникалық қызмет көрсету пункті ашылды
ҚТЖ келбеті
10.10.2025
«Жас үздік маман – 2025»: Теміржолдағы жаңа буын көшбасшылары
Жаңалықтар
10.10.2025
Қысқа қамданыс қалай?
Аймақтар
10.10.2025
Күрмеуі көп кірме жолдар
Жолаушылар тасымалы
10.10.2025
Ұлттық тасымалдаушы теміржол билеттеріне жеңілдіктер мерзімін қысқа дейін ұзартты
Қауіпсіздік
10.10.2025
Маңғыстау теміржолында қауіпсіздік шаралары күшейтілді
Жаңалықтар
10.10.2025
«Қазкөліккәсіп» ҚБ төрағасы теміржолшыларды Кәсіподақ күнімен құттықтады
Жаңалықтар
10.10.2025
Басқарма төрағасы теміржолшыларды Кәсіподақ күнімен құттықтады
Жаңалықтар / Мұрағат
10.10.2025
Қазақстан теміржолшысы газеті, №83 10 қазан 2025 жыл
Жаңалықтар
09.10.2025
Нұрлы жолдан – Достыққа дейін: екінші жолмен сапар
Аймақтар
09.10.2025
Сыр елінде кәсіподақтың 120 жылдығы тойланды
Спорт
09.10.2025
Теміржол ардагерлері шағын футболда бақ сынады