Техникалар талапқа сай

Арыс локомотив пайдалану депосының техникалары жоспарға сай, күзгі комиссиялық тексеруден сәтті өтті.

– Кәсіпорын басшылығының жұмысты жүйелі жүргізуінің нәтижесінде біз локомотивтер мен тепловоздарды түгел дерлік қысқы маусымда қолдануға жарамды етіп, май-суын ауыстырып алдық. Осылайша, көрсеткіш 84,5 процентті құрады. Бұл санды жалпы көрсеткішпен салыстырып қарағанда дерек 100 процентке тең. Ал орташа балдық көрсеткішпен қарағанда, ол 4,01-ді құрады, – дейді Арыс локомотив пайдалану депосының инженер-технологы Абылайхан Ерланұлы.  

Бүгінде Арыс локомотив пайдалану депосының қызмет көрсету аймағы шамамен 500 шақырымды құрайды. Оның 192 шақырымды құрайтын бір бағыты – «Арыс – Сарыағаш», ал 300 шақырымды шамалайтын екінші бағыты – «Арыс–Тараз» учаскесі деп аталады.  

Локомотив депосы негізінен жүк тасымалдау бағытындағы жылжымалы құрамдарға қызмет көрсетуде басымдыққа ие. Мәселен, депо паркіндегі 100 бірлік техниканың 4-еуі ғана жолаушылар тасымалымен айналысса, қалған локомотив пен тепловоздың барлығы жылжымалы құрамдарды Сарыағаш пен Тараз аралығында тасумен айналысады. Яғни, мұндай локомотивтер Ташкенттен келген жылжымалы құрамды Сарыағаштан Таразға және кері бағытта жеткізеді.  

Бүгінде мыңдаған тонна жүкті мыңқ етпей сүйрейтін алып техникалардың қыс мезгілінде тоқтаусыз жұмыс істеуі үшін оларды талапқа сай күтіп-баптау басты мәселе екені белгілі. Сондықтан да күзгі комиссиялық тексеріс – сала мамандары үшін үлкен жауапкершілік жүктейтін маңызды шара. Ал енді Арыс локомотив пайдалану депосына қарасты техникалардың жай-күйінен хабар беретін кестеге көз жүгіртсек, көрсеткіш төмендегідей екен.  

Тексерістен өткен ВЛ80С сериялы электровоздың 58,5 бірлігі (100%), ВЛ40М сериялыдан 2 бірлігі (100%), ТЭМ-2 сериялы тепловоздың 23 (100%) және ТЭ33А сериялыдан 1 бірлігі (100%) мамандар саралауынан өтіп, алдағы уақытта үздіксіз жұмыс істеуі үшін тиісті деңгейде рұқсат қағазы алынған.  

Ендігі жерде ары-бері ағылған жылжымалы құраммен мыңдаған тонна жүктің уақытынан кешіктірілмей тасымалдануын қамтамасыз етіп отырған арыстық теміржолшылар келешекте жоғары көрсеткіштерге қол жеткізіп, биік белестерді бағындырады деген сенім бар.