Теміржол аумағында қауіпсіздік рейді күшейеді
Абай облысы бойынша меншікті тілші
Семей жол дистанциясының мәжіліс залында бірқатар темір жол мекемелері жұмысшыларымен кездесу өткізілді. Жиынға Семей магистральдық желі бөлімшесі мен Семей станциясындағы желілік полиция бөлімшесінің басшылары қатысты.
Жиын барысында Семей станциясы ЖПб-нің бастығы, полиция подполковнигі Ж.Ибраев көлік полицейлерінің осы кезеңге дейінгі атқарған жұмыстары жайлы айта келе, теміржол көлігінде қылмыс пен құқық бұзушылықтың алдын алу, оның ішінде станция аумағында, жалпы пайдалану орындарында тәртіпті қадағалаумен қатар ластануына жол бермеу бойынша бірлесіп жұмыс істеуге шақырды. Теміржол көлігі ел экономикасының дамуына тікелей әсер ететінін және тасымалдаудың негізгі бөлігін атқара отырып, мемлекеттің негізгі көлік артериясы екенін естен шығармау керектігін баса атап өтті.
Сонымен қатар көлік нысандарындағы құқықтық тәртіп пен қауіпсіздікті қамтамасыз ету, азаматтардың теміржолдан өту кезінде қауіпсіздік шараларын сақтауы үшін нендей шаралар атқарылуда, жан-жақты сөз болды. Бұл орайда желілік полиция бөлімі басшылары әр аптаның бейсенбі, жұма күндері көлік объектілерінде құқық бұзушылықтың алдын алуға бағытталған профилактикалық іс-шаралар өткізеді. Сол себепті мекемелер басшыларынан теміржол аумағында рейд өткізуге барынша қатысуды, ұйымдастыруды сұрады.
Кездесу барысында теміржолшылар да пікірі тыңдалып, қойылған сұрақтарға толыққанды жауаптар берілді. Сондай-ақ құқықтық көмек көрсетіліп, заңнама талаптары түсіндіріліп, әлеуметтік мәселелер талқыланып, кеңес берілді. «ҚТЖ» ҰК» АҚ Семей магистральдық желі бөлімшесі бастығының бірінші орынбасары Азат Санмұратұлы бірлесіп жұмыс жүргізуге әрқашан дайын екендерін айтты.