Шар станциясында профилактикалық рейд өтті
Абай облысы бойынша меншікті тілші
Жаңа-Семей жол дистанциясының жолшылары желі бойындағы қараусыз мал мен теміржолды белгіленбеген жерден кесіп өтетіндердің алдын алу шараларына тың қарқынмен кірісті.
Олар осы мақсатта Шар станциясындағы желілік полиция бөлімі қызметкерлерімен бірлескен арнайы рейд өткізді. Профилактикалық іс-шара барысында теміржолға жақын орналасқан ауылдарды аралап, ірі қара мал ұстайтын тұрғындармен бірқатар кездесулер ұйымдастырылды. Мәлім болғандай, кейбір тұрғындар желі бойында мал жаюдың қауіптілігін, оның себебінен туындайтын жауапкершіліктің ауырлығын біле бермейтін болып шықты.
– Шаруаларға ҚР ӘҚБт К-нің 559-бабының 1-ші бөлігінде көрсетілген, яғни теміржол арқылы ат-арба көлігімен, шанамен өту және мініс малын немесе табынды айдап өту талаптары түсіндірілді. Сонымен қатар теміржолдың бөлінген жолағында мал жаю қағидаларын бұзуды алдын алу туралы айтып, құқық бұзған жағдайда әкімшілік хаттама толтырылып, ескерту немесе айыппұл салынатыны түсіндірілді. Тұрғындар тарапынан қолдау таптық, мәселеге түсіністік танытуда, – дейді аталған шаралар барысында пікір білдірген Семей станциясындағы ЖПбнің әкімшілік полиция бөлімінің бастығы, полиция капитаны Рүстем Абеуов.
Қазіргі таңда Семей теміржолы бойынша Жаңа-Семей – Дегелең телімінен кейінгі орында Шар – Жаңа-Семей аралығындағы қараусыз малмен күрес шаралары алдыңғы орынға шықты. Аталған телімдер бойында жыл басынан бері жылжымалы құрамдардың бірнеше шұғыл тежелу фактілері орын алды. Сондықтан Семей магистральдық желі бөлімшесінің басшылығы оқыс оқиғалардың алдын алу бойынша жұмыс тәртібін күшейтуде. Атқарылған шаралар мен орын алған нәтижелер алдағы уақытта өткізілетін жиын барысында сарапқа салынатын болады.