Теміржол көлігі нысандарында жыл басынан бері 745 құқықбұзушы жауапкершілікке тартылды
«Қазақстан теміржолшысы» газетінің тілшісі
Елордадағы «Нұрлы жол» теміржол вокзалында «Көліктегі қауіпсіздік» акциясы өткізілді. Іс-шара теміржол бойында жазатайым оқиғалардың алдын алу, пойыздардың шұғыл тежеу фактілерін болдырмау мақсатында ұйымдастырылды.
20-24 ақпан аралығында өткен акция аясында Желілік полиция басқармасы бірқатар шаралар өткізуге ұйытқы болған. Тәртіп сақшылары, мысалы, вокзал мен оның айналасында такси немесе қонақүй қызметін ұсынып, азаматтардың мазасын алатындарға қатысты мәселе көтерді. Теміржол көлігі нысандарында жыл басынан бері түрлі әкімшілік құқықбұзушылықтар жасағаны үшін 745 құқықбұзушы жауапкершілікке тартылды. Соның ішінде ҚР ӘҚБтК-нің 449-бабы, яғни қоғамдық орындарда біреуге тиісу бойынша – 67 құқықбұзушы, оның 50-і қоғамдық орындарда жеке тасымал қызметтерін ұсыну мақсатында мазалап тиіскені үшін, 7 – пәтер жалдау, 10 – қайыр сұрағаны үшін жауапкершілікке тартылған.
– Аталған акция кезінде «Нұрлы жол» теміржол вокзалының төртінші қабатында орналасқан күту залында басқарма басшылығы, Ақмола көлік прокуратурасы қызметкері және Астана қаласының «Қорғау-Астана» үкіметтік емес ұйымының қызметкерлерімен бірлесе отырып жолаушылар үшін «Вокзалда қабылдау» акциясын ұйымдастырдық. Азаматтарды қабылдау кезінде олардың сұрақтарына тиісті тарап жауап беріп, «Темір жол – қауіпті аймақ» екенін ескерте отырып, түсіндіру жұмыстарын жүргіздік, – дейді вокзал кешенінің технологиялық процесті ұйымдастыру бөлімінің бастығы Ғалия Нүскеева.
Ал вокзал кешенінің еріктілері жолаушылар мен күтіп алушыларға құқық бұзушылықтардың алдын алу мақсатында жасалған жаднамалар мен буклеттер таратқан.