Атырауда темір жол бойымен қозғалыс қалыпты жүріп жатыр
Атырау облысы бойынша меншікті тілші
Жуырда өңірдегі Қызылқоға ауданында су тасқыны Миялы-Жангелдин тас жолын шайып кеткені туралы хабар тарады. Ол темір жолға қауіпті аймақ болып саналмаса да жергілікті теміржолшылар бақылауды күшейтті.
«Миялы елді мекені Сағыздан 100 шақырым қашықта. Ол жақта темір жол жоқ. Сондықтан темір жолға қауіп жоқ. Пойыздар тоқтаған жоқ, темір жол бойымен қозғалыс қалыпты жүріп жатыр», – дейді Сағыз станциясының бастығы Нұрбол Дүйсенбаев.
Рас, еріген қар суы Миялы ауылына қауіп төндіргендіктен, жергілікті билік жолды екіге жарып, суды осылай өткізуге мәжбүр болды. Миялы ауылы маңындағы тасқын су деңгейін төмендету мақсатында 11 наурыз күні сағат 04.30-да Миялы және Жангелдин елді мекендері арасындағы жолдың бір бөлігі арнайы техниканың көмегімен ашылған. Нәтижесінде ауыл маңындағы су деңгейі төмендеп, тасқын судың негізгі бөлігі Жарыпшыққан өзенінің арнасымен ағып кетті. Осылайша елді мекенді су басудың алдын алуға мүмкіндік туды. Қазір барлық қауіпті учаскелерде, соның ішінде темір жол мекемелерінде де тәулік бойы кезекшілік ұйымдастырылған.
Жылыой ауданында да Жем өзенінің су басу мүмкіндігі зор аймаққа Тұрғызба, Шоқпартоғай ауылдары мен Құлсары қаласы жəне Құрсай өзегі жатады. Су басуы ықтимал аймақтарға автокөлік тас жолдары жəне теміржолдар кіреді. Жалпы, облыс аумағында 31 гидротехникалық құрылыс орналасқан. Оның үшеуі су реттеу шлюзі, «Ералы» су торабы, 20 суару-суландыру жүйесі мен жеті судан қорғау бөгеті бар. Су реттеу шлюздерінің техникалық жай-күйі қалыпты, жұмыс жағдайында дейді мамандар. Су торабы негізінен көктемгі өр суларын сақтаудан гөрі, қатты келген судың екпінін бəсеңдетіп, өткізу-тарату мақсатында қолданылады. Сондықтан Құлсары арқылы өтетін темір жолдар жіті бақылауда.