Биыл Маңғыстау станциясында ұрлық бойынша 5 арыз түскен

Маңғыстау станциясындағы желілілік полиция қызметкерлері жолаушылардың жеке мүліктері ұрлануының алдын алу мақсатында пойыздарды аралап, түсіндіру жұмыстарын жүргізді.

Олар жолаушылар пойызына ілесіп жүру жасағымен бірлесіп теміржол вокзалында және жолаушылар пойыздарында халықпен кездесіп, ұрлық-қарлық деректерін болдырмау бағытында әңгімелесіп, «шығасыға иесі басшы» демекші, жеке заттарын қараусыз қалдырмауды, бағалы бұйымдарына қырағы болуды ескертті.  

– Вокзалдарға, жолаушылар пойыздарына ескерту парақшаларын іліп, көпшілікті сақтандыру шараларын күшейтудеміз. Жалпы біз мұндай профилактикалық жұмыстарды аптасына 3 рет өткіземіз. Жолаушылар жолда жүргенде ұялы телефон не басқа да бағалы бұйымдарын қараусыз қалдырмай, мұқият болса оны жоғалту, ұрлату фактілері де болмайтынын ескертеміз. Биыл, мысалы, Маңғыстау станциясындағы желілік полиция бөліміне 5 арыз түсті. Бәрі де жолаушылардың өз абайсыздығынан, бағалы затын қараусыз қалдырып, сыртқа шығып кетуінен туындаған ұрлық оқиғалары. Жедел іздестіру барысында ұрланған заттар табылып, иелеріне қайтарылды, – дейді Маңғыстау ст. ЖПб КПб жедел уәкілі С.Жұматаев.