Жүк тасымалы: Бес айда қозғалыс қауіпсіздігі 24 рет бұзылған
«Қазақстан теміржолшысы» газетінің тілшісі
«ҚТЖ- Жүк тасымалы» ЖШС басшылығы қозғалыс қауіпсіздігіне арналған семинар өткізді. Жиынға серіктестіктің барлық өңірлердегі қозғалыс қауіпсіздігіне жауапты қызметкерлері қатысты. Семинар барысында серіктестік бойынша қауіпсіздікті сақтаудағы жұмыстар баяндалып, саладағы өзекті мәселелер талқыланды.
Семинарды ашып жүргізген «ҚТЖ-Жүк тасымалы» ЖШС бас директорының міндетін атқарушы Марлен Көкірекбаев серіктестіктің басты міндеті – қозғалыс қауіпсіздігін басқару жүйесін ұдайы жоспарлау, жақсарту, мониторингілеу және жүзеге асыру екенін атап өтті.
– Пойыздағы қозғалыс қауіпсіздігі кешенді техникалық-ұйымдастырушылық іс-шараларын жүзеге асыруды қажет етеді. Оған тек жолаушылар мен жүк қауіпсіздігін ғана емес, сонымен қатар экология қауіпсіздігін қамтамасыз ету де жатады. Осы тұрғыда біздің Серіктестік тасымал процесіне жұмылдырылған персоналдың біліктілігі мен құзыреттілігінің жоғары деңгейде болуына мүдделі. Сонымен қатар қауіпсіздіктің корпоративтік мәдениетін қалыптастырып дамытуға барлық жағдай жасайды. Қауіпсіздік жағдайын жақсартуға әсер ететін негізгі бағыттарға – ұйымдастырушылық іс-шараларды енгізу, нормативтік-техникалық құжаттарды талаптарға сәйкестендіру, өндірістік персоналды сапалы түрде оқыту, тексеру іс-шараларының қорытындысы бойынша түзету шараларын жүргізу жатады, – деді Марлен Көкірекбаев.
Оның айтуынша, 2023 жылдың 5 айында серіктестікте қозғалыс қауіпсіздігінде 24 бұзушылыққа жол берілген. Бұл кемшіліктер негізінен Жамбыл, Семей, Қарағанды, Қостанай, Шымкент, Көкшетау, Павлодар теміржолында анықталған. Филиалдардағы бұл олқылықтардың жол берілуіне бірнеше жағдай себеп болған. Атап айтқанда, персоналдың техникалық білімінің төмендігі, мұқиятсыздық, асығыстық, қауіпсіздік ережелерін өрескел бұзу, технологиялық процесті жылдамдатуға асығу бірінші себеп болған. Ал филиалдар басшылары тарапынан жіберілген қателіктер – техникалық оқуды талапқа сай жүргізбеу, технологиялық процесті сақтауды дұрыс бақыламау, профилактикалық жұмыстарды сапасыз өткізу, нормативтерді дұрыс орындамау болып отыр. Олардың бәрін жою бойынша қауіпсіздікті нығайту жұмыстарының жоспары түзілген. Сол жоспарға сай атқарылатын іс-шаралар туралы ақпарат берілді. Әрбір жіберілген қателік бойынша ең қатал тәртіптік жауапкершілікке тарта отырып оперативтік талдаулар жүргізіледі. Әр кемшіліктен сабақ алып, қорытынды шығару керектігі айтылды. Адами фактор себебінен болатын бұзушылықтардың алдын алуға бағытталған Түзету іс-шараларының жоспары жасалып, енгізілді. Техникалық оқыту шеберлерінің рөлі мен жауапкершілігін арттыру, теміржолдағы тармақ иелерімен бірге кіреберіс жолдарды белгіленген талаптарға сәйкестендіру, локомотивтерде бейнекамералар қою, жолда локомотивтер бұзылған жағдайда локомотив бригадаларын техникалық қолдау бойынша Call орталық құру, пойыз құрастырушылар үшін үздіксіз аудио және бейне жазба жасауға бейнерегистраторлар алу, техникалық кабинеттерді қажетті техникамен және оқыту бағдарламаларымен тағы қосымша қамтамасыз ету және тағы да басқа шаралар қабылдау көзделуде.
– Соңғы кездері жүктердің артуына, қозғалыстың көбеюіне байланысты атқаратын жұмыстардың мақсаттарын анықтау, болып жатқан келеңсіздіктердің алдын алуда қандай жұмыстар жүргізу керектігін бүгінгі семинарда талқыладық. Жиында айтылған мәселелердің шешімі бойынша қабылданған шараларды, мақсат-міндеттерді өңірлердегі қызметкерлерге жеткізетін боламыз, – деді Маңғыстау жол бөлімшесінің қозғалыс қауіпсіздігі бөлімінің басшысы Аманқос Құсайынов.
Серіктестікке қарасты қозғалыс қауіпсіздігі департаментінің директоры Ерлан Бүркітов жіберілген әрбір бұзушылыққа талдау жүргізуді ұсынды. Семинар соңында қатысушылар ҚТЖ ғимаратын аралап, Орталық музейге экскурсия жасады.