Семейлік теміржолшылар кәсіби біліктіліктерін шыңдады
Абай облысы бойынша меншікті тілші
Семей станциясында өткен тактикалық жаттығуда жергілікті теміржолшылар қауіпті жүк тасымалдауда кәсіби біліктіліктерін шыңдап, тосын жағдай кезінде әрекет ету шарттарын пысықтады.
Қауіпті жүктер тасымалы қашан да қырағы назарда болады. Өйткені, аты айтып тұрғандай, қауіпті жүктен қатер көп. Сондықтан жүк станциялары қызметкерлері қауіпсіздік талаптарын барынша сақтау міндет. Жуырда семейлік теміржолшылар тораптық Семей станциясында төтенше жағдайлар департаменті қызметкерлерімен бірлескен түрде тактикалық жаттығу жұмыстарын өткізді. Аталмыш шараға станция қызметкерлері мен төтеншеліктер ғана емес, жедел жәрдем дәрігерлері мен тәртіп сақшылары да қатысты.
Оқиға шартты түрде өрбіді. Атап айтсақ, вагон қараушы келіп тоқтаған вагондарды тексеру барысында төгілген күкірт қышқылына уланады. Бұл жайтты оператор бірден диспетчерлерге хабарлайды. Олар өз кезегінде бөлімше басшылығы мен құтқару қызметтеріне қоңырау шалып, оқиға орны жылдам оқшауланады.
Тосын жағдай барысындағы бірінші талап зардап шеккендерге шұғыл көмек көрсету еді. Шамалы минуттар ішінде келіп жеткен жедел жәрдем вагон қараушысына реанимациялық іс-шаралар жүргізіп, жасанды тыныс алдыру аппаратына қосып үлгерді.
Жаттығудың екінші талабы – адамдар мен экологияға төнген қауіпті жылдам сейілтіп, апаттың алдын алу, ақауы бар вагонды оқшаулау. Ал осы уақыт ішінде станция басына келіп жеткен төтеншеліктер улы зат төгілген вагонды залалсыздандыру жұмыстарын бастап кеткен болатын.
Осылайша, шамалы уақыт ішінде теміржолшылармен қоршаған ортаға төнген қауіп толықтай сейілді. Адам шығынына жол берілмеді.
Тактикалық жаттығу барысында тәжірибе көрсеткендей, бірінші кезекте станция диспетчерлеріне үлкен жауапкершілік жүктелетіні анықталды. Бұл ретте олар оқиға басталған сәттен бастап әр істің уақытын белгілеп, ширақ қимылдады. Мұндай даярлық іс-шаралары станция басында кез келген уақытта орын алуы мүмкін апаттың ауыр салдарының алдын алып, желі бойындағы қауіпсіздік талаптарының сақталуына ықпал етері анық.
