Жаяу жүргінші де тәртіпке бағынуы тиіс
Түркістан облысы бойынша меншікті тілші
Жақында «Шымкент-Манкент» және «Шымкент-Игілік» бағытындағы теміржол жиегінде тұратындар тұрғындарымен кезекті кездесу болды.
Шымкент жол дистанциясының бастығы Дәурен Бахиев пен мекеменің жауапты мамандары Әл-Фараби мен Еңбекші ауданы әкімдігі, көлік прокуратурасы, көліктік бақылау инспекциясы, Шымкент станциясының ЖІІБ өкілдері бірлесе отырып, қауіпсіздікке қатысты түсіндіру жұмыстарын жүргізді. Іс-шара аясында жаяу жүргіншілердің арнайы белгіленген жерлер мен туннельдерден өту керектігі кеңінен айтылып, тиісті нұсқаулықтар мұқият түсіндірілді.
Ел ішінде жаяу жүргіншілер көпірлерін пайдаланбай қоршауларды сындырып, теміржол желілерін кесіп өту арқылы өз өміріне қауіп төндіретіндер аз емес көрінеді. Мұндай жағдайда, тәртіп бұзушылар жазасыз қалмай, жауапкершілікке тартылатынын айтады сала мамандары. Мәселен, теміржолдың белгіленбеген жерінен өту – 3 айлық есептік көрсеткіш (11 076 теңге) көлемінде айыппұл салуға негіз болса, бұзақылық әрекетке барып, жолаушылар вагондарының әйнегін сындырған жағдайда тәртіп бұзушы 200 АЕК-тен жоғары айыппұл төлеуге мәжбүр болады. Мұның бәрі ҚР Әкімшілік құқық бұзушылық туралы кодексте тайға таңба басқандай, анық жазылған. Сондай-ақ кодекстің 559-бабында кәмелет жасқа толмаған жасөспірімдер үшін жауапкершілік оның ата-анасына жүктелетіні айтылған. Жалпы, құқық қорғау органы өкілдерінің түсіндіруінше, 16 жастан асқан кінәлілерге әкімшілік құқықбұзушылық хаттамасы толтырылады және тексеру кезінде анықталған заң бұзу әрекеті республикалық бірыңғай базаға енгізіледі. Ал салынған айыппұл сомасы ата-ана тарапынан төленбеген жағдайда, олардың төлем карточкаларын бұғаттау заңда көрсетілген. Бұған қоса мектеп оқушыларына түнгі сағат 23:00-ден кейін ата-анасыз немесе ересек адамсыз көшеде жүрулеріне жол берілмейтіні ескертілді.