Балалар қауіпсіздігі бәрінен маңызды
Маңғыстау облысы бойынша меншікті тілші
Жаз – балалардың демалыс маусымы болғандықтан пойыздардағы жолаушылардың да басым бөлігін осы кішкентай саяхаттаушылар құрайды. Сондықтан көліктегі полиция жазда рейдтік іс-шараларын күшейткен.
Маңғыстаудың Сайөтес станциясындағы желілік полиция бөлімшесінің қызметкерлері станциядан өткен жолаушылар пойыздарын аралап, түсінік жұмыстарын жүргізуде. Жасөспірімдер арасындағы құқықбұзушылықтың алдын алу, балалардың беймезгіл уақытта жүрісін және олардың теміржол бойында жарақаттануын, жазатайым жағдайларға ұшырауын болдырмау мақсатында акциялар мен профилактикалық жұмыстар ұйымдастыруда.
Жақында өткен «Көліктегі қауіпсіздік» акциясы барысында желілік полиция инспекторлары 10 әкімшілік құқықбұзушылықты тіркеп, құқық бұзушыларға тиісті хаттамалар толтырған. Түнгі мезгілде жалғыз жүрген жасөспірімдерді анықтап, қажетті шаралар қолданған. Темір жолды белгіленбеген жерден кесіп өткен бірнеше азаматты әкімшілік жауапкершілікке тартқан.
– Балалар қауіпсіздігі бәрінен маңызды. Темір жол қауіпті аймақ болғандықтан өскелең ұрпақтың осыны терең түсініп, өз өмірін қауіпке тікпеуін ескертеміз. Жауапкершілік баршаға бірдей. Ал заң талаптарын білмеу жауапкершіліктен босатпайды. Бір айтарлығы, осындай алдын алу, ақпараттандыру шараларының нәтижесінде соңғы уақыттарда бөлімше көлемінде балалар мен жасөспірімдердің қатысуымен орын алатын келеңсіз жайттар сиреген, – дейді Сайөтес станциясындағы желілік полиция бөлімшесінің бастығы Нұрлыбек Рахметов.
