Теміржолшылар жолаушыларды жолда қалдырмады

Қаңтар айының басында елде орын алған төтенше жағдайдың елесі әлі басыла қойған жоқ. Алғашында бейбіт шерумен басталған әрекеттер белгісіз күштердің ықпалымен төңкеріске бағытталып, бұзақылық пен бүлікшілікке, одан сорақысы қанды қырғынға ұласты. Rail-news.kz тілшісі сол күндері еш уайымсыз теміржол көлігімен сапарлап шыққан жолаушылар ұшыраған кедергілерге тоқталды.

Сыр өңіріндегі станцияларға әдетте жолаушылар пойызы он бес-жиырма минутқа аялдайтын. Алайда, 5 қаңтар күні жолаушылар пойызының Қазалы станциясында кідіруі ұзаққа созылды.

Бұл сегіз жүзден астам жолаушысы бар Ақтөбе-Алматы, Маңғыстау-Алматы бағытындағы №33-34, №77-78 жолаушылар пойызы еді және де осындай кідіріске ұшыраған пойыздар Сексеуіл, Қызылорда бекеттерінде де болды, олардың әрқайсысында 350-ден аса жолаушы бар-тұғын. Алғашында пойыздардың тоқтап тұрғанына мән бермеген жолаушылар, уақыт өте келе беймәлім кідірі ұзаған сайын шыдамсыздық танытып, перронға шыға бастады.

Жәй ғана шықпай «неге тұрмыз?», «қашан жүреміз?» деп жолсеріктерді сұрақтардың астына алды. Ал шыдамдары сарқылған енді біреулері «вокзал бастығы қайда, бізді неге жібермей тұр», «әкімді шақырыңдар!» деген сарында шу шығара бастады.

Балаларын көтерген аналар төбе көрсетіп жаялықтың қажеттігін, енді бірі демікпесі ұстап дәрігердің қажеттігін білдіріп жатты. Жолаушылардың талабын орындау үшін станция басшылығы мен қазалылық теміржолшылар, аймақ басшылығына хабарласып тез арада кез-келген көмектің жасалу керектігін өздеріне міндет етіп алды. Алайда, жалақыдан жалақыға күн көріп отырған еңбек адамдарында қайдан қор болсын, барлығы аңтарылып ұжым басшысы мен кәсіподақ ұйымына қарады, шығар жол іздеді.

Бұл кезде тағаты таусылған жолаушылардың бірсыпырасы перронды басына көтеріп, ұрандатуға дайын тұрған еді. Алайда шапшаң әрі ұтымды әрекет ете білген қазалылық теміржолшылар дәрігерді де, жөргек пен жылы жамылғыларды да тауып, қазан-қазан ыстық тамақ пісіріп, су-шайды жолаушыларға үлестірумен болды.

Сонымен бекетте аялдаған пойыз жолаушыларына жағдай жасап, көмегін берген аймақ теміржолшылары ауызбіршіліктің арқасында алғыс арқалады. Мұны Қазалыдан және Сексеуілден аттанған пойыз терезесіне балалардың бедерлеп сурет салып, рахмет айтуынан аңғаруға болады. Бұл аймақ теміржолының басшылары Батырхан Базарбаев пен Ибрагим Басықараев басқаратын жергілікті теміржолшылардың ынтымағының көрінісі, бекем бірлігінің жемісі еді.

Қашанда пойыздардың қауіпсіз қозғалысын бабында ұстауға дағдыланған аймақ теміржолшылары бұл жолы жолда қалған жолаушылардың жанынан табылып, қолдан келген көмектерін аямай, қамқорлық көрсетті. Жолаушылар да осынау аласапыран уақытта көмек беріп, қолдарындағы барымен бөліскен қарапайым теміржол еңбеккерлеріне ризашылықтарын білдіріп, баталарын беріп жатты. Бұл да бір халықтың күші бірлікте екенін айқындай түссе керек.

Сабырхан СЕЙІЛБЕКҰЛЫ