Атырауда мұнай экспортының бәсеңдеуі тасымал қарқынына әсер етті

Мұнай өнімдерін тасымалдау көлемінің азаюы өңірдегі жүк тиеу-түсіру көлеміне де әсер ететіні белгілі. Атырау жүк тасымалы бөлімшесінде осындай үрдіс байқалады.

Жүк жөнелтуші кәсіпорындардың кейде мұнай және мұнай өнімдерін экспорттаудан бас тартуы көрсеткіш деңгейіне әсер етеді. Мәселен, Құлсары станциясынан пропан-бутан, Ақжайық станциясынан мазут тиелген цистерналардың экспортқа жөнелтілуіне мерзімді рұқсат берілмеуі жүк жіберу көлемінің азаюына себеп болды. Биылғы жылы бірінші наурыздан бері Украинаға қандай да бір жүкті жөнелтуге және Солтүстік Кавказ темір жолына пропан-бутан өнімін жіберуге тоқтам қою, 15 сәуір -15 мамыр аралығында Атырау мұнай өңдеу зауытының кейбір қондырғыларының жөндеуге тұруы да тасымал көлеміне әсер еткен. Сондай-ақ, «Теңізшевройл», «Батыс Транс Групп», «Индер Тұз Компания», «Тенгизская Транспортная Компания» ЖШС мен Мақат, Құлсары, Теңдік, Қара- батан станциялары арқылы экспорттық бағыттағы пропан, бутан, мазут, кокс, күкірт тиелген 20383 вагон келісілмегендіктен және тапсырыс берушілердің бас тартуы себепті тиелмей қалды. 9-14 мамырда Грузи- яға жүк жіберуге де конвенциялық тоқтам қойылды. 

Әрине, жүк жөнелтуші компаниялардың вагондарды игермеуіне орай, олардан айыппұл өндіріліп отырады. Мысалы, биылғы жылғы 5 айда Құлсары станциясынан 1559 вагон пропан-бутан тиелген вагондарды игермеген үшін 6 567 072 теңге, 1192 вагон химикатты игермеген «Теңізшевройл» кәсіпорынынан 5 046 293 теңге, Теңдік станциясынан «БатысТранс Групп» ЖШС 9858 вагонды игермеуіне сәйкес 44258820 теңге, «Исткомтранс» ЖШС-нан 60 вагонды игермегені үшін 275 670 теңге, сол секілді «Индер Тұз Компания» ЖШС-нан да 540558 теңге айыппұл өндірілген. «Әрине, айыппұлмен мәселе түбегейлі шешілмейді, біз керісінше, жүк жөнелтушілермен қарым-қатынасымызды нығайтып, мұнай мен мұнай өнімдерінің темір жол арқылы тасымалдануына мүдделіміз» дейді Атырау бөлімшесінің техникалық бөлім бастығы Әзиз Айжарықов.