Болашақ теміржолшылар аға буын өкілдерімен кездесті
Атырау облысы бойынша меншікті тілші
Жуырда Атырау агроколледжінің «Теміржол көлігінде қозғалысты басқару және ұйымдастыру» факультетінде білім алып жатқан студенттердің аға буын теміржолшылармен кездесуі өтті.
Болашақ теміржолшылар үшін аға буын өкілдерінің өсиетін естіп өсудің маңызы зор. Сол арқылы олардың таңдаған мамандықтарына деген сүйіспеншілігі мен қызығушылығы арта түседі. Атырау бөлімшесінде диспетчер болып еңбек еткен зейнеткер, Құрметті теміржолшы Күләш Бекқұлова мен байырғы машинист Әлжан Өтеғалиев жастармен кездесуге арнайы шақырылып, теміржолшы кәсібінің қызығы мен шыжығы, өткен өмірлері туралы естеліктер айтты. Ал Атырау жол дистанциясының маманы Болат Жүнісов пен осы дистанцияның кадр бөлімінің бастығы Нұрбике Қасекеева және Атырау вагон пайдалану депосының бас инженері Рашид Мұсабаев студенттерге темір жолдың бүгінгі тынысы туралы әңгімелеп берді. Олардың айтқан естелік-әңгімелерінен студенттер диспетчер деген кім, ол қандай қызмет атқарады, машинист мамандығын қалай меңгеруге болады, жол ақауын табу не үшін керек, теміржолдағы кадр саясаты қалай жүзеге асуда, вагондарды жөндеудің маңызы қандай, т.б. көптеген мәліметтерге қанықты. Олар аға-апаларына теміржолшы мамандығына қатысты әртүрлі сұрақтар қойып, қызықты жауаптар алды. Олардың қандай қиындықтарға қарамастан адал еңбек етіп, мамандықтарына деген шексіз сүйспеншілігі арқасында жоғары жетістіктерге жеткендеріне көз жеткізді. Күләш апа, мысалы, 33 жасында «Құрметті теміржолшы» атағын алса, Әлжан аға көп жылғы бейнетінің рахатын көріп отыр. Теміржолшылар династиясының өкілі Нұрбике Бисенқызы бүгінгі күнгі кадр мәселесі, теміржолшылардың әлеуметтік саясаты, қандай жеңілдіктер бар, біліктілікті көтеру, карьералық өсу, медициналық сақтандыру сынды мәселелерге тоқталып, тәптіштей түсіндірді.
Теміржолшылар студенттерді өндірістік тәжірибеден өтуге жиірек шығару туралы ұсыныстарын да білдірді. Өндірістен келген бұрынғы теміржолшылар, бүгінгі колледж ұстаздары Гүлайым Есенғалиева, Гүлсара Қабдолова, теміржолшы-машинист Нұрлан Қорғанбаевтың айтуынша, осы мамандық бойынша жыл сайын елу шақты студент бітіріп шығады екен. Олардың дені өңір темір жолының әр саласына жұмысқа орналасады. Сондықтан бүгінгі студенттің кәсіби теміржолшылармен кездесіп, өсиетін тыңдауының өзі бір мектеп.