Арыстық теміржолшы бірегей жоба ойлап тапты
Түркістан облысы бойынша меншікті тілші
«ҚТЖ-Жүк тасымалы» ЖШС Шымкент бөлімшесіне қарасты Арыс вагон пайдалану депосының салыстырып тексеру зертханасының бастығы Исламхан Алтаев Ұлттық компанияға 30 048 403 теңге пайда әкелген жоба ойлап тапты.
2023 жылдың 9 наурызында ҚТЖ ғылыми кеңесінің шешімімен РП -72-В нөмірлі «Қысымды өлшейтін манометрлерді тексеруді жүзеге асыру құқығына ие зертханаларды аттестаттау бойынша аккредиттеу саласын кеңейту» тақырыбындағы жобасы мақұлданған өнертапқыштың есімі әріптестері арасында кеңінен танымал. Екі рет «Үздік рационализатор» төсбелгісімен марапатталған маман қырық жыл өмірін Арыс вагон депосында өткізіп келеді. Жай өткізіп келе жатқан жоқ, жыл сайын өндіріске милиондаған сома тиімділік беретін тың жобалар ойлап тауып, пайда әкелуде.
Исламхан Нұртайұлының айтуынша, Салыстырып тексеру зертханасы – өлшем бірлігін қамтамасыз ету мәселелерін шешетін зертхана. Зертхананың негізгі мақсаты – өлшеу нәтижелерінің дәлдігі мен сенімділігіне кепілдік беру болып табылады және ол өлшеу стандарттары мен эталондардың әртүрлі түрлерімен, сондай-ақ өлшеу әдістерімен жұмыс істейді.
– Салыстырып тексеру зертханасы аккредиттеудің белгіленген саласына сәйкес өлшем құралдарын салыстырып тексеру жөніндегі қызметті жүзеге асырады. Арыс вагон пайдалану депосында Салыстырып тексеру зертханасын құрудың негізгі мақсаты тұтынушылардың құқықтары мен заңды мүдделерін өлшеудің жосықсыз нәтижелерінің салдарынан қорғауды қамтамасыз ету, сондай-ақ геометриялық шамалар мен қысымды өлшеу құралдарының белгіленген техникалық және метрологиялық талаптарға сәйкестігін анықтау және растау болып табылады.
«ҚТЖ-Жүк тасымалы» ЖШС-нің тек 3 вагон депосында ғана – Арыста, Семейде, үшіншісі Оралда осылай зертханада жұмыс жасап, сала мамандары рационализаторлық қызметті өрістету мүмкіндігіне ие. Қазіргі уақытта ҚТЖ мен еншілес ұйымдарында қысымды өлшеу құралдары салыстырып-тексеруге аккредиттелген зертханалар жоқ, оларды тексеру үшінші тарап ұйымдарының тексеру зертханаларында жүргізіледі. Біздің соңғы жобамызға сәйкес ендігі жерде өлшеу құралдарын салыстырып тексеруге қайта-қайта шығындалмай, өзімізде жүргізе аламыз, бұл – үлкен үнем, – дейді өнертапқыш-маман.
Айтуынша, өнертапқыштық – ғылыми жұмыс. Техникалық құрылғылар мен приборлар жұмысын жетілдіруде белгілі бір физикалық заңдылыққа негізделеді, формула мен есеп құруды қажет етеді. Исламхан Нұртайұлы «100 жас есім» жастар жобасындағы жас теміржолшылардың әлеуетін ғылыми мақсатқа пайдалану жағын ескеру қажет деп санайды. «Ол үшін компания қолынан іс келетін жастарға мотивация үшін 20-30 пайыздық сыйақы қосып отырса, жастар ғылымға бет бұрып, үлкен жобалар туғызар ма еді» дейді.
– Рационализаторлық қызметті дамытудан кез келген өндіріс тек ұтады. Үйренетін жастар қатары көбейсе, шәкірттер тәрбиелеп, арнайы шеберлік сағаттарын өткізер едік, білгенімізді үйретуден жалықпаймыз. Бекітілген кестеге сәйкес алдағы уақытта – шілде айында Қостанай, Ақмола жүк тасымалы бөлімшелерінің вагон және локомотив пайдалану деполарының өлшеу құралдарын салыстырып тексеруге, қыркүйекте Алматы, қазанда Атырау, желтоқсанда Ақтөбе, Қызылорда, Тараз бөлімшелерінің вагон және локомотив пайдалану деполарының өлшеу құралдарын салыстырып тексеру жұмыстарын жоспарлап отырмыз, – дейді Исламхан Нұртайұлы.
Арыс вагон пайдалану депосының салыстырып-тексеру зертханасында алдағы уақытта жылу-физикалық шамаларды тексеру құқығына аккредиттеу аясын кеңейту жоспарлануда екен.
– Шымкент ЖТ бөлімшесінің кітапханасы жанынан алдағы уақытта рационализаторлық қызметке қатысты шеберлік сағаттарын өткізсек деген жоспарымыз бар. Исламхан Алтаев сынды өнертапқыштар дәрісі теміржолда еңбек етіп жүрген жастарды ғылыммен айналысып, жаңалық ашуға құлшындырар еді деп ойлаймын, – дейді техникалық кітапхана жетекшісі Ляззат Джарымбетова.
