Семейде тәжірибе алмасу алаңы құрылуда

Биылғы жарияланған техникалық дәріс жылы аясында семейлік   теміржолшылар  кәсіби біліктіліктерін шыңдап қана қоймай, өзара тәжірибе алмасу алаңын да құруда. Осы орайда бөлімше көлемінде түрлі семинар кеңестер мен тренингтер көптеп ұйымдастырылып жатыр.

Мәселен, осыдан біраз бұрын бөлімше басшысының логистика бойынша орынбасары Алмас Сейсемкановтың тікелей ұйытқы болуымен аймақтағы жүк шаруашылығы мамандарының басын қосқан келелі жиын өткен болатын. Оған орталық аппараттан келген департамент басшылары мен бас менеджерлері қатысып, баяндама жасап, аталмыш шаруашылық бойынша жүргізіліп жатқан жаңашылдықтар жайлы түсінік берген еді. Семинар кеңес түрінде өткен осынау техникалық дәріс барысында жүкшілер қауымы жүк тасымалы кезеңінде қолданылатын нормативтік-құқықтық құжаттамалар, бұйрықтар мен нұсқаулықтар жайлы да мол мағлұмат алған-ды.  

Бөлімше басшысы Владимир Бабиченко атап өткендей, теміржолдағы аса маңызды саланың бірі - жүк айналымы. Әсіресе, көмір тиеу ісі мейлінше қарқынды, транзиттік тасымал үзіліссіз жүргізілетін бүгінгі Семей өңірі бойынша аталмыш тақырыптың маңыздылығы күн тақырыбынан түскен емес. Осы орайда тек біліммен қаруланған, заманауи жетістіктерді игере алған маман ғана жетістікке жетері анық. Ал, қазіргі таңда жүк шаруашылығы да электронды жүйеге көшіп, тасымал барысындағы техникалық процестер де біршама өзгерген. Мұның өзі әсіресе жас мамандарға үлкен кәсібилік, жауапкершілік жүктейді. Мәселен, аталмыш жиын барысында тораптық станциялардағы тауар кассирлерінің жиі жіберетін қателіктері сынға түсіп, келеңсіздіктерге жол бермеу мақсатында көптеген өзекті сауалдарға жауап ізделінді. Қозғалған тақырып аясында қатысушылар белсенділігі жоғары болғандығын да айта кету ләзім.

Сонымен қатар, жиынға қатысушылар өзара проблемалық тақырыптарды талқылап,  бірқатар басы ашық мәселелерге де ортақ жауап таба алды.

Дәл осындай техникалық дәрістер Семей ЖТ бөлімшесінінде еңбек ететін қозғалыс шаруашылығы мамандарының арасында да өткізілді. Бұл орайда СЦБ жұмысы бұзылған жағдайдағы ДСП іс-әрекеті тақырыбы кеңінен қозғалуда. Осы дәріс кезінде станция қызметкерлері пульт-табло көмегі арқылы стандартты емес жағдай туындаған шақтағы өз міндеттерін толық көрсетіп берді. Сонымен қатар, ойын түріндегі іс-әрекет арқылы да біліктіліктерін шыңдауға мүмкіндік алды.    

Аталмыш техникалық дәрістер өткен аптаның ішінде Күмістау, Бұқтырма,  Алтай сынды станцияларда өткізілді. Осыған дейін Ресеймен шекаралас Локоть станциясында да ұйымдастырылған болатын. Тақырып бір болғанымен мәселе өзекті.

Жалпы, мұндай шаралар қатары алдағы уақытта бөлімшенің өндірістік-техникалық бөлімі мамандарының жетекшілігімен, техникалық дәріс нұсқаушыларының ұйытқы болуымен желі бойындағы өзге станцияларда да жүргізілетін болады.