Теміржол – жас буын көзімен

Семей ЖТ бөлімшесінде болашағын темір жолмен байланыстырғысы келетін жасөспірімдер үшін әрдайым есік ашық. Бөлімше басшылығы мен салалық кәсіподақ ұйымы мектеп оқушылары мен колледж студенттері үшін танымдық-тағылымдық бағыттағы іс-шараларды жиі ұйымдастырады.

Айта кетер жайт, семейлік теміржолшылар осыдан біраз жыл бұрын қаладағы №8 балалар үйінің тәрбиеленушілерін қамқорлықтарына алған болатын. Әлі күнге демеушілік көрсетіп, көмек қолдарын созып отырады. Балалар үйінің жасөспірімдерін бірнеше рет бөлімшеге шақырып, теміржол әлеміне саяхат-сабақ та ұйымдастырды. Олар үшін ең қызықты орта – диспетчерлік орталық, кластан тыс Семей станциясындағы қозғалыс процесін бақылау. Бөлімшеге қарасты желі бойындағы пойыздардың қозғалыс реттілігі мен басқарылуын таблодан тамашалап, сұрақты жаудыртқан балалар арасында болашақта теміржолшы болсам дегендердің қатары артты. Дөңес паркіндегі вагондарды сұрыптау жұмысын алыстан бақылап, пойыз құрастырушылардың жауапты қызметі, вагондардан пойыз жасақтау жұмысын да көзбен көріп, көңілге түйген жасөспірімдер үшін мұндай экскурсия сабақтары, сөз жоқ, олардың алдағы тағдырына, мамандық таңдауына зор ықпал ететіні анық.  

Танымдық шара барысында жасөспірімдер теміржолдың әліппесімен танысумен қатар сала қызметінің күрделі және адам өміріне қауіптілігіне де қанықты. Ал экскурсияны ұйымдастырған теміржолшы жастар оларға бұл саланың жұмысын жан-жақты түсіндіріп беруге тырысады.  

Темір жолға саяхат жасауға тек мектеп оқушылары ғана емес, жергілікті жоғары және арнаулы білім ордаларының студенттері де жиі келеді. Мәселен, Семей электротехникалық колледжі мен Шәкәрім атындағы университет теміржолшылармен тығыз байланыста. Бүгінде Семей ЖТ бөлімшесінің базасында аталмыш оқу орындары шәкірттері үшін дуальды оқыту жолға қойылған. Соның аясында болашақ теміржолшылар үшін практикалық дәрістер жиі өткізіледі.  

Бөлімшеге экскурсияға келетін студенттер өз мамандықтарына сай станция басындағы қозғалыс қауіпсіздігі, жүк тасымалы процесін жүргізу, электрмен қамту және байланыс саласына қатысты дәріс алады. Мәселен, бөлімшенің логистика бөлімінің жүк диспетчері, оқытушы-практик Елена Гуржий арнайы тақырыптар аясында дәріс өткізуді дағдыға айналдырған.  

– Маңыздысы сол, мұндай экскурсия кезінде жастар, мәселен жүк тасымалы процесіне қатысушылар жұмысына қанығып, сезіне де алады. Табло жұмысымен іс жүзінде танысады. Оқу орнындағы тақырыптарды еске түсіріп, «үй тапсырмасын» да айтып береді. Куә болып жүргенімдей, жастардың ынтасы жоғары, дәрістерге қызығушылықпен қатысады, – дейді ол.

Теміржолшылар мен өскелең буын арасындағы байланыс саланың ертеңі сенімді қолда екенін айғақтаса керек.