Ауыр техникалар жұмысты жеңілдетуде

Маңғыстау теміржолының Шетпе станциясында жол бұрмасын ауыстыру жұмысына жолшылармен қатар жергілікті қалпына келтіру пойызы да тартылды. Станция басындағы №18 жол бұрмасын ауыстыру процесінде олардың ауыр техникасының көмегі көп болған.

Бұл – Маңғыстау магистральдық желі бөлімшесіне қарасты №12 қалпына келтіру пойызының келісімшарт бойынша атқарған кезекті жұмыстарының бірі болатын. Мекеме биылғы алты айда келісімшарт бойынша 22 рет станциялардағы әртүрлі жұмыстарға қатысқан. Оның ішінде Маңғыстау жол дистанциясында бұрмаларды ауыстыру, ағаш шпалдар мен темірбетон шпалдарды түсіру, орындарын ауыстыру сияқты жұмыстар бар. Сондай-ақ Шетпе, Өзен, Қарақия станцияларында, №9, 11, 12, 13 бекеттерде темірбетонды шпалдар мен бұрмаларды ауыстыруға да қатысты. Маңғыстау электрмен жабдықтау дистанциясына келген техниканы түсіру, Шетпе станциясында темірбетонды тіректерін құлату қызметтерін де атқарған.  

– Жақында, 27 маусым күні Маңғыстау жол дистанциясы Шетпе станциясындағы №18 бұрманы ауыстырды. Біз де бұл жұмыстарға ауыр техникаларымызбен барып қатыстық. Биылғы 22 келісімшарттың екеуін электрмен жабдықтау дистанциясында, қалғанын жол дистанциясында атқардық. Шетпеге пойызымызбен бірге 12 адам барды. Ескі ағаш шпал мен бұрмаларды алып, жаңасын салдық.  

Бұл жұмыстар шамамен бес сағатқа созылды, кранды жұмысқа дайындау, құру, негізгі міндетті атқару, жол мамандарының жұмысы бәрі осындай уақытты алды. Алда енді Қарақия және Шетпе станцияларында да бұрмаларды ауыстыруға жоспар бар. Қыс келгенге дейін осындай 5-6 жерге барамыз деген ойдамыз. Жол дистанциясына рельстер, шпалдар келеді. Соларды түсіреміз. Оларды орналастырып болғаннан кейін ескі бұрманы алып тастап, жаңасын саламыз. Осындай жұмыстарға қатысып өзіміз табыс табамыз және жергілікті мекемелерге техникамен көмектесеміз, – дейді №12 қалпына келтіру пойызының бастығы Маралбек Нұрмағанбетов.  

Пойыз бастығының айтуынша, аталған пойыз өткен жылы қосалқы жұмыстарды атқару есебінен 8 миллиондай теңге табыс тапқан. Пойыздағы қызметкерлер саны штат бойынша толық, техникалары сапта. Биыл ЭДК-300 краны Қарағандыда күрделі жөндеуден өтсе, жұмысшыларға арналған кластық вагон қазір Арыс станциясында деполық жөндеуде көрінеді. Келесі жылы жеті вагонды жөндеу жоспарда бар екен.