Ғибратты ғұмыр
Маңғыстау облысы бойынша меншікті тілші
ҰОС қатысқан, тылда еңбек еткен ардагерлер қатары жылдан жылға азайып барады. Жеңістің сексен жылдығына санаулы ардагерлер ғана жетті.
Жаңаөзендік Жұма ақсақал – бүгінде түбек теміржолшыларының Жеңіс күнімен құттықтап баратын, «соғыс көрген» жалғыз ардагер. Биыл да тыл еңбеккерінің үйіне барғандар қарасы көп болды.
Теміржолшылар ғана емес, қала, ауылдардан, түрлі мекемелерден келіп қарияны қуантып жатқан өзгелер де көп екен. Дегенмен бәрібір өз әріптестері, ізбасарларын асыға күтіп отырған Жұма Сүйіндіков теміржолшылар келді дегеннен жүзі жадырап, балаша толқыды. Биыл тоқсан бес жасқа жеткен қарияның денсаулығы бірқалыпты, келгендермен әңгіме айтып, амандық сұрасты. Атамызды Жеңіс күнімен құттықтап, хал-жағдайын білуге Маңғыстау локомотив пайдалану депосының және Өзен айналым депосының басшылығы мен кәсіподақ комитеті төрағалары, деподағы басқа да мамандар барды. Басшылықтың алғыс хаты мен бағалы сыйлықтарын, ардагерге алып барған жеміс-жидек, азық-түлік себеттерін табыстады.
– Бұл кісілердің арамызда жүргені, жас буынға үлгі болып отырғаны бізді қуантады. Сұм соғыстың сұрапыл жылдарынан өткен, көпті көрген мұндай ата-апаларымыздың әр әңгімесі ғибратқа толы. Тәрбиелік мәні терең. Біз де Жұма ақсақалдың батасын алып, дидарластық. Жылдағыдай тың болмаса да бізбен бірге отырып, дастарханын дайындатып, сондай жылы қарсы алды. Жүз жасасын, мықты денсаулық тілейміз, – дейді Маңғыстау локомотив депосы кәсіподағының төрағасы Әбілсейт Набиханов.