Темір жол саласындағы жаңашылдықтың өңірлердегі нәтижесі
Ақтөбе облысы бойынша меншікті тілші
Қазақстан экономикасын арттыру, инфрақұрылымды дамыту саясатында теміржол саласының орны ерекше. Пандемия кезінде де еліміздегі көліктік-логистикалық сектор экономикалық өсімнің басты драйверлерінің бірі болды. Географиялық жағынан тоғыз жолдың торабында орналасқан Ақтөбе бөлімшесі елдегі жағдайға қарамастан жүк тасымалы жоспарын әдеттегідей асыра орындай алды. Аймақтағы «Пойыздар қозғалысын басқару орталығының» жұмысы оң көрсеткішке ие. Ақтөбе ЖТ бөлімінің басшысы Бөріхан Сматуллаұлының айтуынша, өткен жылдың желтоқсан айында ашылған диспетчерлік орталық үнемділік көрсеткіштерін еселеп, қозғалыс қауіпсіздігін арттырды. Атырау, Батыс Қазақстан, Маң- ғыстау, Қызылорда және Ақтөбе облыстары аумағында өтетін пойыздар қозғалысы реттелді. Пилоттық жоба «ҚТЖ» ҰК» АҚ-ның сандық трансформация бағыты бойынша пойыздар қозғалысын басқаруды цифрландыру мен автоматтандыруға қол жеткізді. Аймақта пойыз қозғалысын телефонмен хабарлау әдісі толықтай жойылды. Бес облыстағы қозғалысты бір жерден басқарған диспетчерлер пойыздар кідірісін азайтты. Орталық уақыт өткен сайын мүмкіндігін арттыруда. «Пойыздар қозғалысын басқару орталығы» жобасын іске асыру шеңберінде 2021 жылдың 1 шілдесінен бастап Амангелді, Вавилино бекеттерін біріктіру жұмысы жүзеге асырылды. Нәтижесінде орындалған жұмыс көлемі артып, жұмсалатын отын көлемі бірнеше есеге үнемделді. Аймақтағы жартыжылдық жұмысты қорытындылаған Ақтөбе ЖТ бөлімінің басшысы Бөріхан Беркімбаев өңірдегі жүк айналымы жүз пайыздан асыра орындалғанын баяндады. Локомотивтің орташа тәуліктік жүрісі де 100%. Өткен жылдың осы уақытымен салыстырғанда жүк айналымының көрсеткіші 105,9%-ға орындалған.
«Тасымалдау процесінің сапасын жақсартуға қатысты қолға алған шаралар оң нәтижесін берді. Биылғы жылы «Жем-Ақтөбе», «Шұбарқұдық-Мақат», «Әйтеке би-Тобыл» учаскелерін ұзарту арқылы локомотивтер мен локомотив бригадаларының экономикалық тиімділігі мен ұтымды пайдаланылуын арттыру жұмыстары сәтті аяқталды. Пилоттық жобада пойыздардың тоқтау уақыты қысқарды. Нәтижесінде тепловоздардың орташа тәуліктік жүрісі 8 км-ге артты. Жалпы дизельдік отынды үнемдеу 61 990 тоннаны құрап, жалпы экономикалық тиімділігі 165,518 млн.-ға жетті», – деді Бөріхан Беркімбаев.
Аймақтағы пойыздар кестесінің орындалуы да өткен жылмен салыстырғанда жақсарған. Қозғалыс қауіпсіздігін қамтамасыз етудің оң динамикасы байқалады. «Ішкі жергілікті нормативтік-техникалық актілерді, қозғалыс қауіпсіздігі және еңбекті қорғау бойынша нормативтік-техникалық құжаттаманы жетілдіру жұмыстары толықтай аяқталды. Сәйкесінше, жол қозғалысы қауіпсіздігі оқиғаларының төмендеуіне қол жеткізілді. «Қазақстан темір жолы» ҰК» АҚ- ның корпоративтік әлеуметтік саясатын іске асыру жұмыстары жалғасып келеді. Өндірістік үрдістердің тиімділігін және еңбек өнімділігін арттыру, өндіріс құралдарын жаңғырту және дамыту, үрдістерді басқаруды автоматтандыру, өндірістік активтердің құрылымын оңтай- ландыру, энергияны және ресурсты үнемдеу экономикалық тиімділікті қамтамасыз етті», – деді Бөріхан Сматуллаұлы.