Тәуелсіздіктің 30 жылдығына орай мыңнан астам теміржолшыға сый-сияпат жасалмақ
Ақтөбе облысы бойынша меншікті тілші
Ұлттық компания ел Тәуелсіздігінің 30 жылдық мерейтойын ауқымды көлемде атап өтуді жоспарлап отыр. Мереке құрметіне мыңнан астам теміржолшы түрлі марапатқа ие болады. Сонымен қатар, марапат иелеріне төленетін өтемақы екі есеге өседі. Бұл туралы «ҚТЖ» ҰК» АҚ басқарма басшысының орынбасары, қауіпсіздік жөніндегі департамент директоры Шәкенов Марат Арапбекұлы бастаған жұмыс тобының сапарында белгілі болды. Өңірлерді аралап жүрген жұмыс тобы мүшелері теміржолшыларды ашық байланысқа шақырды. Нұр-Сұлтан қаласынан Ақтөбе өңіріне келген ұлттық компанияның жұмыс тобының жергілікті теміржолшылармен кездесуінде компанияның жұмысшылар алдындағы жауапкершілігі сөз болды. Жұмысшылардың әлеуметтік және еңбек құқықтары, заңды мүдделерін сенімді қорғауды қамтамасыз етілгені айтылды.
«Еңбек ұжымдарындағы әлеуметтік тұрақтылықты қолдау мақсатында біз үшін әрбір теміржолшының еңбек жағдайларының тиісті деңгейін қамтамасыз ету ең маңызды мәселе. Біз сол үшін алдарыңызға келіп отырмыз. Сіздердің ұсыныс-пікірлеріңізді тыңдауға, шешуге және басшылыққа жеткізуге дайынбыз», – деді басшының орынбасары, қауіпсіздік жөніндегі департамент директоры Марат Шәкенов жергілікті теміржолшылармен кездесуде.
Басқосуда сала қызметкерлерінің құқын қорғау, еңбекақы төлеу және ұжымдық келісімшартпен бекітілген әлеуметтік төлемдер туралы кеңінен сөз болды. 
«Бүгінде теміржолда жұмыссыз қалған адам жоқ. Құрылымдық өзгерістер мен оңтайландыруға байланысты қысқаруға ұшыраған теміржолшы басқа жұмысқа ауыстырылады, басқа мамандыққа оқытылады, ал арнайы бағдарламамен ерте зейнетке шыққандарға қосымша төлемақы төленеді. Ерте зейнетке шығудың жұмыс өтіліне әсер ететіні алдын ала түсіндірілуі қажет», – деген кәсіподақ төрағасының орынбасары Жұпарбек Сәбитов ақтөбеліктерге ұялы телефон нөмірін беріп, әрдайым кері байланысқа дайын екенін жеткізді.
Сонымен қатар, биылғы жылы екі рет он пайызға жалақы өскені теміржолшылар тарапынан оң бағаланып отырғаны, 2022 жылдың қаңтарында тағы да жалақыны көтеру мәселесі қаралып жатқаны айтылды.