Жаз қызығы жалғасуда
Атырау облысы бойынша меншікті тілші
Атырау теміржолшыларының балалары үшін биылғы жазғы демалыс уақыты маусым айының аяғында басталды.
Табиғат құлпырып, жеміс-жидек пісіп-төгілген шақта балалар лек-легімен жазғы демалыс лагерлеріне аттануда. Бірінші лекпен 48 бала Ақтөбедегі «Әсем» лагерінде демалып келді. Шілденің орта шенінде тағы 60 бала Қостанайдағы «Светофор» лагерінде жазғы демалысын көңілді өткізді. Өткен сенбі 19 шілде күні 18 бала көрікті Көкшедегі «Парус» балалар лагеріне аттанып кетті.
«Атырау жүк тасымалы бөлімшесі бойынша биыл 7-13 жас аралығындағы барлығы 138 бала 10 күн бойына жаз жайнатып, күн күлдіріп демалып қайтады», - дейді кадр бөлімінің менеджері Е.Тарихов.
Сол секілді Атырау магистральдық желі бөлімшесі бойынша да 120 бала Ақтөбедегі «Әсем» сауықтыру орталығында демалады.