Елордаға саяхат

Астанадағы «ҚТЖ» ҰК» АҚ бас ғимаратында еліміздің Маңғыстау, Тараз, Көкшетау өңірлерінен келген теміржолшы отбасыларының 60 баласы орталық мұражайды, қысқы бақты аралап, панорамалық жеделсатымен көтеріліп, елорданы алақандағыдай көріп, тамашалауға мүмкіндік алды.

Балалардың жазғы каникулда Астанаға төрт күндік экскурсиясын ұйымдастырып отырған «Қазкөліккәсіп» ҚБ мәліметінше, биыл 260 астам бала еліміздің түкпір-түкпірінен елордаға атбасын тіреп, бас шаһардың көрнекті жерлері – «Бәйтерек», «Думан» ойын-сауық орталығы, Ұлттық музей, Орталық саябақ, тағы басқа жерлерді аралап, түрлі тамақ әзірлеудің шеберлік сабақтарына қатысып, аниматорлармен көңілді кештер өткізген. Бұл жолы келген үшінші кезеңнің кішкентай саяхатшыларымен «Қазкөліккәсіп» ҚБ төрағасы Оразғали Ахметбаев кездесті.  

«Бүгін сендер ата-аналарың жұмыс істейтін теміржол компаниясының бас ғимаратына келіп отырсыңдар. Бұл жер – теміржолды басқару орталығы. Кім білген, келешекте сендер де ата-аналарың сияқты теміржолшы болып, осы жерде жұмыс істеулерің әбден мүмкін. Ол үшін ең бастысы сабақты жақсы оқып, білімді болуға ұмтылу керек. Астанаға қош келдіңдер. Демалыстарың есте қаларлықтай әсерлі, қызықты өтсін. Денсаулық, амандық, сәттілік тілеймін!», – деді төраға.  

Жас жеткіншіктер Теміржолшылар мұражайын аралап, теміржол тарихынан сыр шертетін жәдігерлермен танысты. Қысқы бақты аралап, суретке түсті. Панорамалық жеделсатымен көтеріліп, Астананы жоғарыдан тамашалады. Саяхат соңында балаларға тәттілер мен естелік сыйлықтар табыс етілді.