Жас үздік маман: білім бәсекесінің үздіктері

Ақтөбе және Орал жүк тасымалы бөлімшесінің мықтылары «Жас үздік маман» байқауында бақ сынады. Шараға жиырмадан аса теміржолшы қатысты. 

Аймақтық байқаудың өту тәртібінде барлық эпидемиологиялық жағдай сақталған. Басқармада бас қосқан теміржолшылар арақашықтықты сақтап, қорғаныш құралдарымен қамтамасыз етілді. 

Теміржолшылар арасындағы мықтыларды анықтау бәсекесі екі бөлімнен тұрды. Оның біріншісінде тест тапсыру болса, екінші бөлімде билет таңдау арқылы сұраққа жауап беру керек. 

– Тест 25 сұрақтан тұрды. Шарттардың ішіне жауаптың дұрыс болуымен қатар, шапшаңдық та ескерілді. Әр артықшылық балл көрсеткішімен есептелінді. Бұл байқау жастарға жігер беріп қана қоймай, әрдайым біліктілігін арттырып отыруға жетелейтіні сөзсіз. 

Себебі, сүрінген сұрақтың жауабын білуге ұмтылыс, білсем деген құлшыныс жастарды алға жетелейтіні рас, – дейді техникалық бөлім басшысы Жасұлан Рсқалиев. 

Жауап беру көрсеткіштері мәреге бірдей болып жеткен кезекшілерге қосымша сұрақтар беріліп, үздіктері таңдалды. Жіңішке станциясының кезекшісі Асқар Сәндібай байқаудың барлық талаптарын орындап, ең жоғары балл жинады. 

Аймақтық «Жас үздік маман» байқауының жеңімпазы Асқар Сәндібай – Атырау қаласының тумасы. 32 жастағы жас маман жеті жылдан бері Жіңішкеде станция кезекшісі. 

– Ақтөбе теміржол бөлімшесінің бірнеше разъезінде еңбек еттім. 2013 жылдан бастап Жіңішке станциясында жұмыс істеп келемін. Негізгі міндетім – пойыздарды қабылдап, жөнелтіп отыру. Құрамды құрастыру, шашу жұмыстарын бақылаймыз. Байқауға қатысуға станция басшысы ұсыныс жасаған болатын. Алдағы уақытта республикалық байқауда да сенімді ақтауға тырысамын, – дейді Асқар Сәндібай. 

Білім сайысында жоғары көрсеткішке жеткен үздіктерге жеңімпаз дипломы мен техника бұйымдары берілді.