4 баласы мектеп жасындағы жалғызбасты ананы қабылдады

Ақтөбе ЖТ бөлімшесінің басшысы Бөріхан Беркімбаев төрт баласы мектеп жасындағы жалғызбасты ананы қабылдады. 

Бөріхан Сматуллаұлы көпбалалы ананың хал-жағдайын сұрап, балаларының үздік оқушы болуына тілектестігін білдірді.

«Компания тарапынан әрдайым қызметкерлерге әлеуметтік көмек көрсетіліп, қамқорлыққа алу шаралары жиі ұйымдастырылады. Теміржолшылардың балаларына арналған жобамыз да жоқ емес. Жыл сайын балалар мерекесі мен жаңа оқу жылында қолдан келгенше демеп отыруға тырысамыз. Жалғыз өзі төрт бірдей баланы оқытып отырған Айжан қарындасымызға алғыс айтамыз, оқушыларымыз талантты, алғыр, еңбекқор, үздік балалар қатарында болсын», – деп ағалық қамқорлық танытты бөлімше басшысы. 

Басшының қабылдауында болған Жіңішке станциясының тауар кассирі Айжан Танованың қуанышында шек жоқ. 17 жылдық еңбек өтілі бар теміржолшының төрт баласы да мектеп жасында. Айжан 2003 жылдан бастап теміржол саласында еңбек етеді. 

Алғашында оператор болса, кейін жүк қабылдаушы қызметін атқарған. 2007 жылдан бері тауар кассирі. 

«Сыйлық алуды күткен жоқпыз. Басқармадан қоңырау шалып, басшының қабылдауына арнайы шақырды. Жылы сөз, жақсы тілектер мерейімізді өсіріп, көңілімізді қуантты. Балаларым теміржолшы ағаларының сыйлығын алып қуанып қалды. Алғысым шексіз», – дейді Айжан Танова.

Айта кетейік, «Мектепке жол» акциясы аясында биыл Ақтөбе өңірінде 70-ке жуық отбасының балаларына оқу құралдары таратылды.