Ақтөбелік түлектер теміржолшылар қатарын толықтырды

Батыс өңірдегі теміржолшылар даярлайтын білім ордасы – Ақтөбе көлік, коммуникация және жаңа технология колледжінің бір топ түлектері жергілікті теміржолшылар қатарын толықтырды. 2020-2021 оқу жылын тоғыз мамандық бойынша бітірген 388 түлектің жартысынан астамы аймақта түрлі мекемелерге жұмысқа орналасқан. Студенттердің инновациялық технология бағытымен кәсіби бағытта білім алуына, оқытудың жаңа технологияларын үйретуге бағытталған заманауи жаңа қондырғылармен жабдықталған 49 оқу кабинеті, 9 шеберхана, 8 компьютерлік кабинет, 15 зертханалық, шет тіліне арналған 2 лингафондық, 1 оқу-әдістемелік кабинеті, 1 баспахана, 1 оқу полигоны, спорт залдар мен конференциялық залдар бар. Колледжде мамандарды даярлау әлеуметтік серіктестік қатынастағы кәсіпорындардың белсене араласуымен жүргізіліп келеді. Бүгінгі күні колледж студенттердің теориялық білімін тәжірибемен ұштастыру мақсатында 23 мекемемен келісім-шарт жасасқан. Олардың қатарында «Қазақстан темір жолы» ҰК» АҚ Ақтөбе магистральдық желі бөлімшесі мен оған қарасты Ақтөбе жол дистанциясы, Ақтөбе белгі беру және байланыс, электрмен жабдықтау дистанциялары, «Қамқор Локомотив» ЖШС филиалы – Ақтөбе локомотив жөндеу депосы, «Транстелеком» филиалы, Батыс аймақтық «Лизинг-Ақтөбе» филиалы, «Жолаушылар тасымалы» АҚ жергілікті филиалы, тағы басқа мекемелер бар. Колледжде дуальды оқыту жүйесі 2012-2013 оқу жылынан бастап «Темір жол жылжымалы құрамдарын пайдалану, жөндеу және техникалық қызмет көрсету», «Теміржол көлігінде тасымалдауды ұйымдастыру және қозғалысты басқару», «Темір жол көлігіндегі автоматика, телемеханика және қозғалысты басқару» мамандықтары бойынша оқу процесіне енгізілді. Студенттердің мекемелерде тәжірибе алмасуына толық мүмкіндіктер туды. Мұның бәрі, сөзсіз, білім беру деңгейінің артуына әсерін тигізді. Жаңа инновациялық технологиялар мен жан-жақты жаңа бағдарламалардың оқу процесіне енгізілуі мамандар дайындауда жоғары нәтижелер беруде. Ақтөбе теміржол колледжі 1932 жылдан бері жұмыс істеп келеді. Осы жылдар ішінде теміржолдың әр саласы бойынша 40000-нан астам маман дайындап ұшырған. Колледж 3 оқу ғимаратымен, 2 студенттер жатақханасымен қамтылған.