Ақтөбелік ардагер теміржолшы 40 жылда салалық газетінен коллекция жинады

Ақтөбе локомотив пайдалану депосы ардагерлер кеңесінің төрағасы Александр Алпысбаев бір ғасырлық тарихы бар теміржолшылардың салалық газетінен коллекция жинайды. Ардагердің архивінен «Қазақстан теміржолшысы», «Гудок», «Болат жол», «Стальная магистраль» газеттерінің қиындысын көруге болады. Ұлттық компаниядағы корпоративтік құндылықтың сонау заманнан жолға қойылғанын айтқан ардагер теміржолшыларды – Тәуелсіз Қазақстанның әлеуетін арттыратын алып күш деп санайды. Александр ақсақал – өз мамандығын тағдырының бір бөлшегіне айналдырған тұлғалардың бірі. Саналы ғұмырын теміржол саласының өркендеуіне арнап, жарты ғасырға жуық осы салада еңбек етті. Бүгінде деподағы ардагерлер кеңесі арқылы «үлкенге – құрмет, кішіге – ізет» жасауға жол бастап жүр. Газет бетіне шыққан теміржолшылардың өмірі, апаттың алдын алған теміржолшылар, соны жетістіктері туралы материалдарды жинау – Александр ақсақалдың хоббиі. Мұны жас күнінен әдетке айналдырған. Газет қиындылары сарғайса да қағаз бетіндегі тарих болып сақталып тұр.

«Менің коллекциям осы. 1980 жылдан бері осы газет қиындыларын жинаймын. Бәрі де теміржолшылар туралы. Бұл – тек естелік қана емес, қазақ теміржолының тарихы. Бұл жерде теміржолға ұзақ жыл еңбек етіп, қайтыс болып кеткен әріптестерім туралы естеліктер бар. Осы қиындыларды қарап отырып, теміржол саласының дамуын, теміржолшылардың маңдай тер еңбегін көруге болады», – дейді Александр ақсақал.

Қарт теміржолшы еңбек жолын 1958 жылы бастаған. Өмір бойы машинист болды. 1989 жылы «Құрметті теміржолшы» атанды. Қазір екі немересі Ақтөбе стан- циясында атасының жолын қуып, еңбек етеді.