Атырауға екпе салдыру үшін баратын ауылдықтар тегін вагонмен қамтамасыз етілді
Атырау облысы бойынша меншікті тілші
Бүгінде коронавирусқа қарсы екпе алуға ниеттілер саны аудандарда да көбейіп отыр. Осыған орай Атырау облысының әкімшілігі «Қазақстан темір жолы» АҚ Атырау жүк тасымалы бөлімшесімен бірлесіп ауыл тұрғындарына вакцинаны облыс орталығынан алу мүмкіндігін сыйлады. Осы мақсатта темір жол тарабы арнайы вагондар бөліп, жол бойындағы Қызылқоға және Мақат ауданының халқын тегін апарып-әкелуді өз мойнына алды. Екпе алушыларды Атырау темір жол вокзалынан арнайы автокөліктер күтіп алып, олардың бір бөлігі Атырау теміржол ауруханасының, екіншілері қалалық №7 емхананың екпе алу орындарына жіберілді.
– Аудандардан келіп, ерікті түрде екпе алып жатқандардың саны 50-ге жуықтайды. Олардың бір бөлігі вакцинаның екінші компонентін салдырып жатыр. Ауыл тұрғындарының бұлайша белсенділік танытуы бізді қуантып отыр. Себебі, індеттен құтылудың жалғыз жолы екпе алу екенін көпшілік түсіне бастағандай. Облыстық әкімшіліктің мұрындық болуымен ұйымдастырылған бұл шара алдағы уақытта Атырау жүк тасымалы және магистральдық желі бөлімшелерімен бірлесіп Құрманғазы және Исатай аудан дарының халқы үшін де ұйымдастырылатын болады, – деді облыстық денсаулық сақтау басқармасының басшысы Асхан Байдуалиев.
Басқарма басшысының айтуынша, қазір облысымызда ресейлік «Спутник V», Қытай елінде шығарылған «CoronaVac», «VeraCell» және отандық «QazVac» вакциналары салынуда. Қай түрін алатынын екпе алдырушы өзі таңдайды. Олардың ішінде теміржолшылар да аз емес.
– Менің жасым 61-де. Бүгін вакцина алуға бел байладым. Осыған дейін көп ойландым. Себебі, халық арасында екпе жөнінде түрлі қауесеттер жүрді. Қазір індеттің күннен-күнге өршіп бара жатқанын көзбен көріп отырмыз. Төңірегімізде ауырып жатқандар да бар. Сол себепті, «Сақтансаң – сақтаймын» дегендей, өздігімнен екпе алуды ұйғардым, – дейді Жантерек станциясының электромонтері Ерік Жұбанов.
Айта кетерлігі, пойызда екі вагон бар, Сағыздан Атырауға дейінгі жолдағы барлық станция, разъездерге тоқтап, вакцина алуға тілек білдіргендерді қалаға жеткізіп, кешке кейін алып келеді. Жолаушылар үшін жүру ақысы тегін. Пойыз екі араға осылай 10 күн бойына қатынайды. Сонымен қатар вакцина алғандарға сыйлықтар табысталады.