Ақтөбе теміржолшылары оншақты қарияның шаңырағына барып, азық-түлік таратты

Ақтөбе магистральдық желі бөлімшесінің теміржолшылары мерекеде он шақты қарияның шаңырағына барды, соның ішінде жалғызілікті қариялар назардан тыс қалмады. Қарт теміржолшыларға мерекелік сыйлықтар мен гүл шоқтары, азық- түлік себеттері таратылды. Бөлімшенің кәсіподақ төрағасы Айша Қалағанова, Оралда қарттар үйінде тұрып жатқан теміржолшы қарияны сол қаланың вокзал ұжымы құттықтап барғанын жеткізді. Ал Ақтөбе бөлімшесіне қарасты Бершүгір жол дистанциясының ұжымы «Қарттарым – асыл қазынам» мерекелік шарасын өткізіп, теміржолшы қарияларға арнап дастархан жайды.

«Ауылымызда теміржол саласында еңбек етіп, еліміздің дамуы жолында, ел игілігі үшін елеулі жұмыс атқарған ардагерлеріміз аз емес. Біз оларды әрдайым жоғары бағалаймыз. Қарттарымыз аман болсын», – дейді Бершүгір жол дистанциясының көпір шебері Есенғали Құдайберген.

Айтулы шараға жиылған қонақтар жылына бір келетін мерекедегі қамқорлыққа дән риза болып, екі жылдан бері әлем халқын үреймен ұстап келе жатқан пандемияның артта қалуын тіледі. Жол дистанциясы қызметкерлері шара соңында мереке иелеріне сый-сияпаттар табыстады. Бұл күні Ақтөбе локомотив депосының кадр бөлімінің менеджері Талғат Көшербаев пен ардагерлер кеңесінің төрағасы Александр Алпысбаев қарттар үйінде көңілі жабырқаулы отырған әріптесі Светлана Беспертыхқа барып, «тосынсый» жасады. 80 жасқа қараған Светлана әжей ұзақ жыл Ақтөбе локомотив пайдалану депосының кадр маманы қызметінде болды. Әріптестерінің алдында сыйлы болған қарт теміржолшыға депо қызметкерлері осылайша құрмет көрсетіп, ұзақ әңгімелесіп, жеміс-жидек себетін тарту етті.