Бас мүфти атыраулық теміржолшылармен кездесу өткізді

Жақында Қазақстан мұсылмандар діни басқармасының төрағасы, бас мүфти Наурызбай қажы Тағанұлы бастаған топ Атырау магистральдық желі бөлімшесінде болып, темір жол саласы еңбеккерлерімен кездесті. Діни тәрбие – бүгінде ерекше көңіл бөлуді қажет ететін қоғамның бір саласы. Өйткені жат ағымдар жастарды өздеріне тартып, дәстүрлі діннен алшақтатып жүр. Оның алдын алып, жастарымыздың діни сауатын арттыру үшін үгіт-насихат жұмыстары керек-ақ. Осы мақсатта, ұжым мүшелерімен кездескен Бас мүфти еліміздегі бүгінгі діни ахуал туралы қысқаша тоқталып, «Ихсан – рухани тәрбие негізі» атты жаңа кітаппен таныстырды. Наурызбай қажы жастарды адасып, жат ағымның жетегінде кетпеуге, діни сауаттылықтарын арттыруға шақырды. Өз кезегінде еңбек ардагері, көп жылдар бөлімшеде басшылық қызметте болған Н.Есенов қонақтарды Атырау теміржолының тарихымен таныстырып, үш Социалистік Еңбек Ері шыққан өңір теміржолшылары- ның өткен және бүгінгі жасампаз істері туралы баяндады. Кездесу соңында Бас мүфти жаңа кітаптың бірнеше данасын теміржолшыларға тарту етіп, бөлімше басшысы Е.Сапаровқа діни басқарма атынан Алғыс хат табыстады.