Астанада өткен марафонда теміржолшылар жеңіс тұғырынан көрінді

Өткен сенбіде «Самұрық-Қазына» Қоры Астанада Charity Samruk Marathon 2024 қайырымдылық марафонын өткізді. Оған қордың өзге де барлық портфельді компанияларымен қатар ҚТЖ-ның 20-дан астам қызметкері қатысты. Солардың арасынан 4 адам топ жарды.  

Спорттық іс-шара елордадағы Триатлон саябағында 5 км, 10 км және 10 км қашықтықта эстафета бойынша өтті. Қызметкерлердің балаларына арналған қашықтық 400 және 1000 метрді құрады. Марафонға тіркеу жарналарынан түскен барлық қаражат әлеуметтік және қайырымдылық жобаларын іске асыруға бағытталды. Жарыста 10 км қашықтыққа жүгіруден 30-39 жас аралығындағы қатысушылар бойынша бірінші орын алған 30 жастағы жол монтері Еркебұлан Ахмадиев Семей жол дистанциясында 3 жылдан бері еңбек етеді. Бұл қашықтықта барлығы 400-дей адам жүгірді. 

– Спортпен, соның ішінде жүгірумен 2016 жылдан бері айналысамын. Аптасына 10-12 рет жүгіріп жаттығу жасаймын. Бір ұлым бар, оны да спортқа баулып жүрмін. Жұмысымыз сол – рельс, шпал ауыстыру, жол күтімін жасау. Қолымыздан лом мен балға түспейді. Бастысы – теміржолда қозғалыс қауіпсіздігін қамтамасыз ету маңызды міндет. Сондай-ақ компания намысын қорғап осындай спорттық жарыстардан да қалмауға тырысамын, бұл – мен үшін үлкен мақтаныш, – дейді жеңімпаз жолшы.  

Осы қашықтықта 40-49 жас аралығында бірінші орынды «ҚТЖ-Жүк тасымалы» ЖШС департамент бас менеджері Динара Шаймерденова алды. Оған қоса теміржолшылар арасынан ҚТЖ Жол диагностикалау орталығы менеджері Расұлан Қуанышқан 5 км қашықтыққа жүгіріп, бірінші орын иегері болса, осы қашықтықта үшінші орынды «ҚТЖ-Жүк тасымалы» ЖШС департамент бас менеджері Гүлмира Сапарғалиева иеленді. Марафонның ашылу салтанатында «Самұрық-Қазына» АҚ басқарма төрағасы Нұрлан Жақыпов марафон қатысушыларының қандай маңызды іске үлес қосқанын жеткізді.  

– Қайырымдылық – қор жұмысының маңызды бағыттарының бірі. Мысалы, су тасқынынан зардап шеккен өңірлерге біз 22 млрд теңгеден астам қаржы бөлдік. Оның ішінде 10 млрд теңгені «ҚазМұнайГаз» АҚ, 3 млрд теңгені «Қазатомпром» АҚ, 3 млрд теңгені «ҚТЖ» ҰК» АҚ, 2 млрд теңгені «Самұрық-Қазына» АҚ және басқалары бөлді. Сол сияқты су тасқынынан қиын жағдайға түсіп қалғандарға бірқатар компаниялар арқылы теміржолмен, әуе жолымен, автожолымен тегін тасымалдау қызметін көрсеттік. Сол сияқты бүгінгі марафоннан түскен қаражатты да біз инклюзия бағытына пайдаланамыз. Астананың мектептерінде арнайы инклюзия сыныптарын ашамыз. Осы марафон арқылы 125 млн теңгеден астам қаражат жинадық. Сондықтан аталған іске осындай үлкен қосып жатқан  барлық қатысушыларға көп рахмет, – деді ол.