Бірінші тоқсанда 65 млн тоннаға жуық жүк тасымалданды

Биылғы жылды да табысты тәмамдаудың барлық алғышарты бар дей аламыз. «ҚТЖ» ҰК» АҚ желісіндегі жүк тасымалы көлемі, яғни алғашқы үш айдың қорытындысы осыған дәлел. Бірінші тоқсанда 64,4 млн тонна жүк тасымалданып, бұл көрсеткіш өткен жылдың сәйкес кезеңімен салыстырғанда 5% артқан, деп хабарлайды Rail-news.kz.

Республикаішілік тасымалдар 41,4 млн тоннаға ұлғайып, 5% өскен, ал экспорттың 22,9 млн тоннаға өсіп, былтырғыдан 6% артқаны байқалады.
Таратып айтсақ, биылғы қаңтар-наурыз айлары аралығында 29,5 млн тонна тас көмір тасымалданып, оның көлемі өткен жылдың осы кезеңімен салыстырғанда 8% жоғары болып отыр. Оның ішінде қазақстандық тұтынушыларға 20,5 млн тонна қатты отын жеткізілген екен, бұл көрсеткіш 2021 жылғы деңгейден 2% көп.

Сондай-ақ 2,6 млн тонна астық тасымалданып, өсім 17% құрады. Химиялық тыңайтқыштар тасымалы 8% (1 млн тоннаға жуық), құрылыс жүктері 4% ( 2,3 млн тоннаға дейін) өсті. Сонымен қатар 4,3 млн тонна мұнай жүктері, 5,8 млн тонна темір және марганец кені, 5,4 млн тонна түрлі-түсті кен, шамамен 1 млн тонна қара металл тасымалданған.

Тек наурыз айында «ҚТЖ» ҰК» АҚ желісінде жүк тасымалдау көлемі 22,4 млн тоннаны құрап, ол өткен жылдың сәйкес кезеңіндегі көрсеткіштен 6% артық шыққан. Республикаішілік тасымалдар 8% өсіп, 14,4 млн тоннаға дейін ұлғайды. Экспорт өткен жылғы деңгеймен салыстырғанда 2%-ке, яғни 8 млн тоннаға артқан. Барлығы 9,8 млн тонна көмір тиеліп, оның 6,8 млн тоннасы ел ішіне таратылған. Астық тиеу 25% өсіп, 974 мың тоннаны құрады.

Сонымен қатар химиялық тыңайтқыштар тасымалы 18%, құрылыс жүктері 20% дейін өскен. Сондай-ақ, қара металдың 372 мың тоннасы, мұнай жүктерінің 1,5 млн тоннасы, темір және марганец кенінің 2 млн тоннасы және түрлі-түсті кеннің 1,8 млн тоннасы тиеліпті. Демек, алғашқы тоқсан табысты қорытындыланды деп, келер күнге болжам жасауға болады.