«Қазтеміртранс» АҚ табысқа қол жеткізді
«Қазақстан теміржолшысы» газетінің тілшісі
Үстіміздегі жылы «Қазтеміртранс» АҚ жүк жөнелтушілердің әлеуметтік маңызы бар жүктерді тасымалдау бойынша сұраныстарын 100% қамтамасыз етіп, барлық негізгі көрсеткіштер бойынша табысқа қол жеткізді.
Теміржол операторы Қазақстан нарығындағы үлесін 1%-ға арттырып отыр. Өткен жыл қоғам үшін күрделі жыл болғанына қарамастан компания барлық тапсырмаларды орындап, қаржы-шаруашылық қызметінде оң нәтижелерге қол жеткізген. Былтыр 4805 бірлікке жылжымалы құрамды жөндеу бойынша ұлғайтылған жоспарды орындау және жасалған келісімге сәйкес 242 жаңа вагон сатып алу есебінен жұмыс істеп тұрған вагон паркінің саны 2022 жылмен салыстырғанда 2796 бірлікке ұлғайған. Ал жұмыс істемейтін парк 5102 вагонға төмендеген. «ҚТТ» АҚ алға тартқан мәліметке сүйенсек, өткен жылы жүк жөнелтушілердің әлеуметтік маңызы бар жүктер мен көмірді тасымалдауға қатысты тапсырысы – 100%, астық тасымалдау жоспары – 95%, «Қазақавтодор» ЖШС мен ҚР ИИДМ тапсырысы бойынша жол құрылысына қажетті қиыршық тас өнімдерін тасымалдау 99%-ға орындалған.
Компания басшылығы осы арада клиенттердің қанағаттану деңгейі 86% құрағанын, ал бұл 2022 жылға қарағанда 1% көтерілгенін, сондай-ақ Қазақстан Республикасындағы нарық үлесі 46%-ға дейін өскенін, ал бұл көрсеткіш 2022 жылы 45%-ды құрағанын атап өтті. Осы ретте Көкшетау, Қостанай, Павлодар, Алматы, Қызылорда және Ақтөбе қалаларындағы филиалдар жыл қорытындысы бойынша өндірістің жоспарлы көрсеткіштерін асыра орындап, жақсы нәтижелер көрсеткен.
Сонымен бірқатар филиалдарға ҚТЖ-ЖТ-ның өңірдегі бөлімшелерімен және «ТТС» ЖШС филиалдарымен жергілікті өзара іс-қимылды жақсарту; жөндеуді күтіп тұрған вагондардың тұрып қалуын жою; вагондарды бөлшектеу кезінде автоматты басқару жүйесіне қосалқы бөлшектер туралы ақпаратты уақытылы енгізу; жөндеу жұмыстарымен айналысатын жұмысшылардың техникалық деңгейін арттыру; ағымдық ағытып алып жөндеуге вагондарды ағытып алу себептеріне бақылауды күшейту тапсырмалары жүктелген.
2024 жылға арналған негізгі міндеттерге келсек, олардың қатарында Жүк вагондарын жөндеу бойынша өндірістік бағдарламаны жүзеге асыру, жұмыс істемейтін парктер мен ағымдық жөндеуге баратын вагондар санын қысқарту, экспортқа вагондарды тиеуді ұлғайту, өтімсіз қорларды азайту, сондай-ақ жаңа клиенттерді тарту сияқты басқа да шаруалар межеленген.