ҚТЖ желісінде жүк тасымалы 4,5%-ға артты

2025 жылдың қаңтар-сәуір айының қорытындысы бойынша ҚТЖ желісінде жүктерді тасымалдау 4,5% өсіп, 85 млн тоннаны құрады, деп хабарлайды Rail-news.kz.  

Осы көлемнің 54,6 млн тоннасы ел ішінде тасымалданды, экспортқа 30,4 млн тонна жөнелтілді, бұл 2024 жылдың сәйкес кезеңімен салыстырғанда 12,7% артық.  

2025 жылдың төрт айында 34 миллион тонна тас көмір тасымалданса, бұл өткен жылдың сәйкес кезеңімен салыстырғанда 1,1% жоғары. Осы көлемнің 24 млн тоннасы қазақстандық тұтынушыларға жөнелтілді. Бұл ретте көмір экспорты 22% өсіп, 10 млн тоннаға жетті.

Астық тасымалдау көлемі де 54% артып, 4,7 млн тоннаны құрап, айтарлықтай өсім көрсетті. Астық экспорты 60% өсім көрсетіп, 3,7 млн тоннаға жетті.  

Бұдан басқа, 2025 жылғы қаңтар-сәуір аралығында басқа жүктерді: мұнай жүктерін тасымалдау 7% (6,6 млн тоннаға дейін), қара металдарды — 10,6% (1,5 млн тоннаға дейін), химиялық тыңайтқыштарды — 20,8%  (1,6 млн тоннаға дейін) және құрылыс жүктерін тасымалдау 8% (4,3 млн тоннаға дейін) өскені байқалды.